Real hmaah Ronaldo siam liantu Sporting

UEFA Champions League champion lai Real Madrid chuan zanin dar 12:15-a an match hmasa berah Sporting Lisbon an mikhual dawn. Portugal captain Cristiano Ronaldo-a'n a chawrchhuahna Sporting a hmachhawn lai hi Ten 1 HD-ah a en theih ang.

Group F inkhel dangah Polish club Legia Warszawa leh Borussia Dortmund-te an inkhel ang.

United lamtluang

Cristiano hian Man-chester United zawm ta lo pawh nise a pianpui thiamna leh Sporting Lisbon-a kum ruk chhung a inzir tawhna aṭangin thui tak a thleng thei tho ang. Chutihrualin Ronaldo-a'n tun dinhmun a thlen theih nan Sir Alex Ferguson hnathawh a ropui takzet.

June 2002 khan Carlos Queiroz chuan Sir Alex-a pui turin Manchester United a zawm a, Portuguese coach hian Scottish manager hnenah Sporting Lisbon-ah player ṭha tak a awm thu a hrilh. Ferguson-a'n player beiseiawm pathum vel lai an awm nia a hriat avangin tu ber nge tia an zawh chuan Queiroz chhannaa chu 'Ronaldo' a ni.

Sir Alex hian hetih hunlai pawh hian Ronaldo chanchin hi a hre tawh a, Sporting Lisbon hi United in Portugal club zinga inremna an siam pui hmasa ber an ni. United lamin coach tah hriam nan Lisbon lama coach an tirh ang bawkin Portuguese club-in an tir let ve bawk. Hetih hunlai hian Ronaldo hi forward ah dah ṭhin a ni a, United lamin amah zirchiang turin Jim Ryan chu Lisbon-ah an tir tawh.

Jim chuan, "Player ṭha bik ka hmu. Youth team tan chuan forward ah tlan mah se winger a niin ka hria. Kan nghak rei thei lo ang, kum 17 a tlin chuan club tam takin sum tam tak an hmang ngam tawh ang," tiin a thil hmuh dan chungchang a sawi.

Ronaldo leh a agent be loin United-in Lisbon an be nghal a, amaherawhchu Portuguese club hian an hnena kum hnih tal la awm se an tih thu an lo sawi thung. Kum 2013 nipuiah Euro 2004 puala sak Sporting Lisbon stadium thar hawn nan United sawm an ni a, friendly match an khelh ṭuma right back chu John O'Shea a ni.

Ronaldo hmaah O'Shea a mualpho a, United player-te'n Sir Alex Ferguson bulah player ṭha bik Ronaldo lakluh an duh thu an sawi bawk. Sir Alex chuan chief excutive Peter Kenyon bulah lei dil turin a hrilh nghal a, ani chuan Lisbon hotute a biak hnuin Real Madrid-in pound maktaduai riata an ngam thu an sawi a, Sir Alex-a'n pound maktaduai kua chhiar turin a hrilh. A awmzia ber chu Scottish manager hian lak hrim hrim a tum.

Hemi ni vek hian Sir Alex hian Ronaldo leh a agent Jorge Mendes be nghalin a tukah private jet lain Ronaldo, a nu, a unaunu, Jorge Mendes leh dan hremi chu Manchester lamah an hruai phei nghal. Ronaldo-a'n pound maktaduai 12.24-in United a zawm a, a hun laia English football history-a teenager manto ber niin khawvela player manto ber a nih zui dan sawi zui ngai loin khawvelin a chanchin an hria.

Engtin zel?

Ronaldo hian United tana a khelh laiin Sporting nen hian group khatah an awm tawh a, Portugal captain hian vawi hnih an inhmachhawn ṭumin goal a khung ve ve. Real Madrid tana a khelh hnuah United hi 2012/13 season last 16-ah a hmachhawn ve leh a, Ronaldo hian Santiago Bernabeu leh Old Trafford-ah goal a khung leh ve ve bawk. Tun ṭumah hian Real kawr hain Sporting a hmachhawn dawn a, Ronaldo tan zan danglam a ni.

Ronaldo chuan, "Ka tan chuan team special an nih avangin Sporting hmachhawn hi match danglam bik a ni. Team ṭha tak an ni a, coach ṭha tak a an nei a, ka nuna match pawimawh tak a ni," tiin inkhel a ngaih pawimawh thu a sawi.

Euro 2016 final-a a inhliam hnuah Ronaldo hi Inrinni khan a rawn kir leh chauh a, Celta Vigo 4-0 a an sawp ṭumin minute rukna lekah goal a khung. Real Madrid forward chuan, "Champions League kan champion zawhah European Championship-ah nomawi ka chawi leh a, ram tana nomawi ka chawi hmasak ber a nih avangin ka tan chuan ka hun tawn zinga ropui ber a ni," tiin season liam ta a hman ṭhat thu a sawi. Nomawi chawi nawn chungchang sawiin Ronaldo chuan, "Real Madrid hian nomawi chawi nawn leh turin theihna kan nei a, mah se a awlsam dawn lo. Kan match khelh apiangah theihtawp kan chhuah ang. A êng zawngin kan hmalam thlir ila chu chuan nasa takin min pui thei ang," tiin a sawi.

Kum 20 hnuah

Borussia Dortmund hma-chhawn tur Legia Warszawa hi kum 20 hnua Poland club zinga Champions League-a inlan leh thei hmasa ber an ni. Warszawa hian Ger-man club hi vawi riat an hma-chhawn tawh a, chak hmel an la hmu ngai lo. Dortmund erawh kum khat Champions League khel loa an awm hnuah Thomas Tuchel-a hoin an rawn kir a, sum ṭha hnem tak an hman bawk avangin chak zawk tura rin an ni.

July 2012 khan club pahnih hian friendly match an lo khel tawh a, hemi ṭum hian Robert Lewandowski goal hmangin Dortmund an chak. German club hian Bundesliga match hnuhnung berah RB Leipzig 0-1 a an hneh loh avangin an phur vanglai tak a ni dawn lo a, Legia pawh hi an muala khel tur ni mah se Stadion Wojska Polskiego-ah hian inelna hrang hrang match hnuhnung pangaah chak an nei lo.