Lukaku hattrick Black Cats mualphona

Stadium of Light-ah Everton striker Romelu Lukaku-a'n Thawhṭanni zan khan Premier League-a a vawi khat nan hattrick a siam. Toffees-in Sunderland 3-0 in an sawp a, Ronald Koeman hoten tun season-ah hneh loh la tawng loin pathumnaah an invawrh chho.

David Moyes erawh a club hlui Everton lakah point thum a hlawhchhuah theih loh avangin tun season-ah chak an la nei lo a, Manchester United manager hluiin season ṭantirh lama 'relegation fight' turin fan-te inring tura a chahna chu a dikna hmuh chhoh zel a ni.

Chanchin ngah Lukaku

Belgian striker Lukaku hi nipui transfer-ah a club hlui Chelsea-a let leh tura sawi a ni a, season ṭan hmaa chanchin ngah berte zinga mi a ni.

Sunderland an hmachhawn hma hian Belgium-in Cyprus an hmachhawn a, Premier League atana inpuahchahna ṭha zawk an neih theih nan 'private jet' hawhin England an pan. Amaherawhchu Liverpool, Manchester United, Manchester City leh Burnley ten an player-te chuan man an tum sak laiin Everton erawhin Lukaku leh Kevin Mirallas te chu an hlawh aṭanga pe turin an ti.

Mi pakhat chuan man hi £6,500 (Rs 5,78,480) a ni a, Everton club neitu hi billionaire Farhad Moshiri a nih bakah Lukaku hian twitter lamah lungawi lohna thuziak a neih bawk avangin English media ten an bawhzui nasa hle.

Hetah hian thutharthedarhtu ten duhtawk mai loin Lukaku-a'n tun hnaiah Everton tan goal khung a harsat tih chu uar takin an ziak bawk. Ani lah taka, Lukaku hian March 12 khan FA Cup quarterfinal-ah a club hlui Chelsea lamah goal hnih a khung a, hemi hnu hian Toffees tan goal a khung leh lo.

Minute 1,139 hnuah

Hun chanve lamah Stadium of Light-ah goal a lut lo a, Toffees boss Ronald Koeman-a'n huaisen takin khelṭha lo England midfielder Ross Barkley aiah Gerard Deulofeu chu second half ṭan chiahah a luhtir a, Everton goal nawr a nat phah sawt.

Aston Villa aṭanga Everton zawmtu Idrissa Gueye cross chu Lukaku-a'n minute 60-naah a khung a, Beligan striker hian minute riat hnuah Crystal Palace aṭanga Toffees zawmtu Yannick Bolasie thawhrah a seng leh bawk. Lukaku hian March thlaa Everton tana goal a khung aṭanga minute 1,139-naah goal a khung leh ta a, hemi hnu hi chuan khung a harsat tawh lo - minute 11 chhung lekin hattrick a siam.

Everton keeper Maarten Steke-lenburg-a'n vawi hnih chiah hna a nei a, hun tawp lamah phei chuan Sunderland ṭantute beidawngin stadium an chhuahsan hial.

Eng nge an sawi?

Season liam ta khan Sunder-land-in Premier League khel zel turin Everton hi 3-0 in an hneh a, Roberto Martinez-a'n a hna a chan phah bawk. Toffees mualpho ṭum aṭang khan thla thum chiah a la liam a, manager thar Koeman hnuaiah Everton-in Black Cats 3-0 in an hneh let der tawh.

Everton boss Ronald Koe-man chuan, "Media lam aṭanga sawiselna chhang let tur chuan goal a ṭha ber a, chuvangin Lukaku tan hattrick siam hi a pawimawh a ni. Kan team theihna ka hrechiang a, match li chauh kan la khel nachungin season thara European competition sawi ngam turin kan ṭha tawk a ni," tiin a inringtawk hle.

Sunderland boss David Moyes chuan, "First half-ah khelh ṭhat chang nei mah ila kan goal chhuah dan a nem deuh a ni. Player thar rem khawm tih chu hre tho mah ila ka player-te khan an tihtur an ti lo a ni. Keipawhin khatiang taka an defending ṭhat loh chhan kha ka hre duh a, an channa hriat ka nghakhlel tawh hle. Hun tawp lam minute 30 chhung kan khelh danah khan ka lungawi takzet a ni," tiin an khel ṭha lo tih a zep lo.