Rio-ah Baka a tlan chak fal

Algeria paralympian Abdellatif Baka chuan Rio Paralympics 2016 neih mekah mit (eye) fiah lo te inelna 1500m - T12/13 chu 3:48.29 chhunga tlan thlengin an ram tan gold medal a hlawh chhuak.

Baka hnungah hian Ethiopia tlangval Tamiru Demisse (3:48.59) a tlan thleng a, pathumna chu Kenya aiawhtu Henry Kirwa (3:49.59) a ni.

Kumin Rio Summer Olympic neih zawh takah khan mipa 1500m intlansiakah hian United States aiawhtu Matthew Centrowitz Jr. chuan 3:50.00 chhunga thlengin gold medal a lo la tawh. Matthew a hun hman ai hian Baka hun hman hi a tlem zawk tihna a nih chu!

Kum 22-a upa Baka hian 2012 Summer Paralympics, London-ah khan 800m intlansiakah an ram tan gold medal a lo la tawh bawk a ni.