Juventus mikhual tur Europa champion

Zanin dar 12:15 hian Juventus chuan Champions League group match khel turin Spanish team ṭha Sevilla chu Turin-ah an lo mikhual ang. Pound maktaduai 75 man striker Gonzalo Higuain-a'n a club thar tan inelna lian a hmachhawn ṭan dawn.

Team pahnihte hi season hmasa khan group stage-ah tho an lo intum tawh a, Italian champion Juve hian an khelmualah 2-0 a hnehna changin Sevilla hian an khelmualah 1-0 in hnehna an chang ve thung - tun ṭumah hian chak zawk tur rinthiam a harsa.

Juve hian an midfielder pawimawh Paul Pogba chu khawvela player manto ber ni turin Manchester United-ah an hralh a, French midfielder awm loh hnua an game hautak hmasa ni tura ngaihah hian striker manto Higuain a pawimawh lehpek hle ang.

Serie A top scorer Higuain hian 'thau' tia sawisel tute khelmual chhung-ah goal hmangin a chhanglet zel a, league match thum a khelh tawh
aṭangin goal thum a khung leh der tawh. Angentina international hi Sevilla tlarhnung su hawng turin a ṭha tawk.

Massimiliano Allegri naute hian Champions League final an khelh hnuah season hmasa khan last 16-ah Bayern Munich an hneh lo a, kuminah Pogba chhuah mah se Higuain bakah Miralem Pjanic leh Marko Pjaca te an lakluh avangin league lamah chuan an ṭha tawk tih a chiang chho leh tawh - Europe-ah fiahin an awm dawn.

Hetihlai hian Juve khingpui tur Sevilla hi sawi nep theih an ni lo. La Liga club hian a zawnin Europe League nomawi ṭum thum an chawi thei a, kartawp league inkhelah Las Palmas 2-1 a an hneh bawk avangin inrintawkna nen Juventus stadium an pan ang.