Champions League Leicester City tan zan danglam
Premier League champion Leicester City-in zanin dar 12:15-ah Belgian Pro League champion Club Brugge an lenchilh dawn. Leicester City tana Champions League match hmasa ber tur a nih avangin zanin an inkhel tur hi an hriatreng a ni tawh dawn - chak loh an duh lo tawp ang.
Tottenham Hotspur-in kum nga hnuah Champions League an khel ve leh dawn ta a, London club hian French club ṭha Monaco an mikhual dawn.Europe a club inelna sang bera an inlan hnuhnung ber 2010/2011 season-ah khan quarterfinal an luh avangin Bayer Leverkusen leh CSKA Moscow awmna group aṭanga an la thlen phak ngai loh thleng tur chuan zanin aṭanga bul an ṭan a ṭul ang.
Zin kawng ngaihnawm
Kum 2013-ah kha chuan Lei-cester City-in English second division-ah Championship foot-ball an la khel a, Premier League an invawrh kai hnu 2014-15 sea-son-ah relegation battle an hma-chhawn a, Nigel Pearson-a kaih-hruaina hnuaia an league match hnuhnungin fak a hlawh hle.
2015-16 season inṭan hun tur a lo herchhuak a, club neitu Vichai Srivaddhanaprabha-a te ram Thailand-ah pre-season tour neiin Foxes an feh chhuak. Player ṭhenkhat hnam inhmuhsitna rawngkaia che zingah manager Nigel Pearson-a fapa James Pearson a tel ve avangin a pain a tawrh ve a ṭul a, 2008–09 season-a League One club an nih laia enkawl ṭantu, Premier League thleng hruai kai thei coach hi an ban.
Leicester-in amahni siam liantu coach an ban danin sawisel a hlawh a, a aiawh tura an lak lah Greece-in duh loa an ban hnu Claudio Ranieri a ni - mahse, Italian manager hian hollywood movie lam chauha thleng ṭhin emaw kan tih kha a takin min hmuhtir a, relegation sual tura ngaih Foxes chu Premier League nomawi a chawipui - zaninah Champions League an khel dawn ta.
Intluk tawk
Premier League champion Leicester-in tun thleng chuan champion khelhin an la khel lo - league match li an khelh tawhah vawi khat chiah hnehna an chang a, an match hnuhnung berah phei chuan Liverpool-in 4-1 ngawtin an sawp.
Mahse, an result vangin Leicester an buai phah lo. Manager Claudio Ranieri-a'n result duhawm lo tak an neih hnu lawkah an insiamṭhat ṭhin thu a sawi a, zaninah a thusawi dik leh dik loh a hriat dawn.
Club Brugge-in inchhuanna tur an nei tam bik lo. Tun season-a league match ruk an khelh tawhah vawi hnih chiah hnehna la changin Belgian club hi an talbuai lai tak a ni a, Foxes tan zanin hi Club Brugge hmachhawn tura hun duhthusam a ni.
Hetihrual hian Belgian club hian Premier League club vawi 10 an hmachhawn tawhah vawi ruk hnehna an chang thei a, vawi hnih chiah an tlawm - an tlawm ṭum hi nikum Champions League playoff-a Manchester United an hmachhawn ṭum kha niin inrintawkna nen Foxes an hmachhawn ang.
Foxes tan pound maktaduai 29 man Islam Slimani a inlan tawh ngei a beiseiawm a, Jamie Vardy, Riyad Mahrez leh Ahmed Musa an la awm cheu bawk avangin Brugge tlar hnung ten hnathawh tur an ngah hlein a rinawm.
Spurs tan fiahna
Tottenham-in an Champions League match hmasa bera Monaco an mikhual tur hi game awlsam anga ngaih chi a ni lo - French club hian tun season-ah tlawm hmel an la hmu miah lo a, Ligue 1-ah hmahruaitu dinhmun luah mekin Champions League khel turin qualifying kalkawngah Fenerbahce leh Villarreal te an hneh thei.
Spurs-in tun season-a Pre-mier League match li an khelh tawhah vawi hnih hnehna changin vawi hnih an khingpui an inhnehtawkpui a, an league match hnuhnung berah Stoke City chu 4-0 tehmeuha an sawp theih avangin inrintawkna nasa tak nen Monaco an mikhual ang.
Mualneitu team tan Harry Kane chu tlarhmaah mal tlat tura beisei a ni a, English striker thlawp turin Victor Wanyama, Eric Dier, Christian Eriksen, Erik Lamela leh Son Heung-min te an la awm cheu avangin Monaco tlarhnung ten hna an ngah dawn tihna a ni.
Monaco hi zam lutuk tur an ni bik lo. Euro 2016-a Por-tugal cham-pion-na kawnga player pawi-mawh zinga mi Joao Mou-tinho leh Europe-a rawlthar bei-seiawm ber pawl Bernardo Silva te an kawl a, tun season-a match hnih a inlana goal hnih khung tawh Radamel Falcao erawh bench-ah hun a hman a rinawm.