India tana silver latu Deepa Malik

Deepa Malik chuan India infiamna chanchinah bungthar a ziak ta! Rio Paralympics neih mekah Haryana lam chhuak hian lung den (shot put F-53)-ah silver medal a la - India hmeichhe zingah Paralympics-a medal la thei hmasa ber a ni.

Kum 45-a upa Deepa hian 4.61m zeta thui dengin pahnihna a ni a, pakhatna Fatema Nedham chuan 4.76m a thui dengin Dimitra Korokida (4.28m) chu pathumna a ni thung.

Deepa hi a kawnga chin hnuailam a ṭhat loh avangin wheelchair hman a ngai a, fa pahnih nei tawhin a pasal chu Army officer a ni bawk - kum 15 liamta aṭanga a kawng chin hi ṭha lo a ni a, a kawng leh ke velah hian
ṭum 31 zet zai tawk tawhin hmun 183-ah teh meuh chilh a ni tawh nghe nghe.

Deepa chuan, "He ka medal dawn hi India rama hmeichhe rualbanlote chawikan nana hman ka duh. India team zinga kum upa ber ka ni thei hi a makin a lawmawm a, kei leh ka chhungte tan chuan zinkawng ngaihnawm leh hlu tak a ni," tiin a sawi.

Silver dawngtu Deepa chuan sawi chhunzawmin, "Inbuatsaihna ka nei ṭha hle a, ka thawhrim rah a rawn langchhuak ta a ni. Rio-ah medal pathum kan la ta a, hei hian India a rualban lote infiamna kawngah phurtharna a thlen theih ka beisei a, hmasawnna leh ruahmanna ṭha zawk a hrin chhuah ngei pawh ka beisei," tiin a sawi.

Infiamna lamah Deepa hian hnuhma a nei lian hle a, thleng thlawh (javelin throw) a Asia record chelhtu niin kum 2011 World Championship-ah khan lung denah silver medal a lo dawng tawh bawk. Chawimawina a dawn hrang hrang zingah Arjuna Award (2012) leh President Role Model Award (2014) te chu a langsar an ni.

Deepa hming hi Limca Book of Records-ah ṭum hnih ngawt a lo chuang tawh a, kum 2008 khan 1km zeta zau Yamuna lui a hleuh kai vang leh kum 2013-a 58km a thui bike intlansiaka a tlan theih vangin a hming hi a lo chuang tawh.

2016 Summer Paraly-mpics-a silver medal a dawn vang hian Haryana sorkar chuan vaibelchhe li an pek tur thu an sawi nghal bakah Ministry of Youth Affairs and Sports chuan nuai 50 an pe dawn tih a chiang bawk. Rio Games-ah hian Deepa hma hian Mariyappan Thangavelu leh Varun Singh Bhati te chuan high jump-ah gold leh bronze medal an lo la tawh bawk.