Sudeva Sports-in Aizawlah trial nei dawn

India rama football club lian nih tuma indin chho Sudeva Sports Private Limited chuan September 21 leh 22 hian Aizawlah mipa leh hmeichhe football player an rawn zawng dawn.

New Delhi-a hmunpui nei, sports company hian foreign coach ṭhate ruaiin Delhi-ah football club lian tak din an tum. Tunah hian an academy-a lut tur zawngin India ram hmun hrang hrangah trial an kalpui a, hei bakah hian mipa leh hmeichhe team an din thar bawk.

Sudeva hian Swedish coach Fredrik Bagerfeldt chu technical director/head coach atan an lalut a, ani hi UEFA A License nei a ni. Amah puitu tur assistant coach hi Nigerian international defender
ṭhin Rabiu Afolabi a ni. Afolabi hian chhuan tham sulhnu neiin Napoli, Standard Liege leh Monaco-ah pawh lo khel tawh a, Champions League lamah pawh a inlan tawh. Nigerian under-20 team captain hlui leh 2002 leh 2010 World Cup-a Nigeria squad-a tel thei defender tawnhriat hi a hraw hle.

Hei bakah hian season hmasaa I League Under 15-a Minerva champion-puitu Nigerian Coach tho Franklin Ojaega chu naupang ho enkawltu atan an lalut a, coaching staff ṭha tak tak an lalut tawh bawk.

Trial dan tur

Rajiv Gandhi Stadium-ah academy-a awm tur Under 12 leh Under 14 mipa naupangte tan September 21-ah trial an nei dawn.

September 22-ah hian mipa leh hmeichhia senior team-a khel tur tan trial an nei ang - mipa hi 2nd Division I League-ah an inlan ang a, hmeichhe tana I League siam tharah team an nei dawn bawk a ni.

Trial-a tel duh tan Under 14-ah kum 2002, January 1 hnu lama piang chin tur a ni a, Under 12-ah hian kum 2004, January 1 hnu lama piang an ni tur a ni.

Birth certificate original ken a ngai a, kum lanna school certificate ken tel tur a ni a, passport size thlalak pahnih a ngai bawk. Zing dar 8-ah Rajiv Gandhi Stadium-ah inkhelh thawmhnaw nen kim tur a ni.