AC Milan an tla!

Champions League knockout playoff-ah result beisei loh a thleng nual - AC Milan-in Feyenoord lakah hma takah goal khung mah se, kim loa khel zuiin, goal an chhuah bawk a, Feyenoord-in an pet chhuak.

Team pahnih intawn hmasakah Dutch club hian 1-0 in hnehna an chang a, San Siro-a inkhelah Milan tan tlang turin chak ngei a ṭul - minute khatna lekah Santiago Gimenez hmangin goal hmahruai an khung zui.

Gimenez hian corner hlawh chhuakin, Christian Pulisic chuan a pet a, hei hi Malick Thiaw chuan lo tauhin, heta ṭanga ball kal hi Mexican striker Gimenez hian goal-ah a chantir.

Kum 23 mi striker hian February 3 khan AC Milan hi Feyenoord aṭang hian a pan ve chauh a, Milan a pan hma hian Dutch club tan match 19-ah goal 16 a khung hman.

A club hlui lakah goal a lo khung zui a, a lawm duh lo - Dutch club hi a pet chhuak ngei dawn niin a lang hman. Milan hian inkhel an thunun zui a, mahse, goal hmaah an vannei tawk lo.

Chelsea aṭanga loan-a an hawh Joao Felix chuan chance duhawm vawi hnih ngawt a hlah a, a shot pakhat hi Feyenoord goalkeeper Timon Wellenreuther chuan dang perin, a per lehlam chu Theo Hernández chuan goal zawnah a pet thei lo.

Milan vanduai a kaltluang - minute 51-naah Hernandez chuan a yellow card pahnihna hmuin hnawhchhuah zui a ni a, Feyenoord an phur sawt. Dutch club hian minute 73-naah Julián Carranza hmangin an khung ta nge nge a, 1-1 a inkhel tawpin, inkhel pahnih belhkhawmah 2-1 in Feyenoord an chak a, an tlang.

San Siro-ah inkhel boruak a sang a, hun tawp hnuah Feyenoord player Givairo Read hnawhchhuah a ni. Dutch club hian kum 1970 khan European Cup-ah champion nomawi an lo chawi tawh. Hemi ṭum pawh hian second round-ah Milan chu 2-1 in an lo hneh tawh a, thawnthu hlui her lum theih an beisei ang.