Verstappen nen kan inkar a ṭha - Russell

Mercedes driver George Russell chuan Formual 1 champion lai Max Verstappen nen an inkar a ṭhat thu a sawi, season hmasa lama boruak ṭha lo tak an neih tawh chu a ṭha lo zawnga hriatreng a tum lo a ni.

Season hmasa Qatar Grand Prix an tlan laiin Verstappen hi Russell laka a chet dan avangin hrem a ngai hial a, champion tuma bei a nih avangin a hmaa thil awm leh amah tibuai thei tur a beih letna lamah dan a bawhchhe ve hial.

Kum 27 mi Russell chuan, "A nihna takah chuan a hun lai kha chuan ka lungawi lo hle a, a hnu lawkah ṭawngkam mawi vak lo ka hmang tih pawh ka hria, kan hun tawn ngaihtuah kha chuan inchhirna leh indemna pawh ka nei hran chuang lo.

"Chutihrualin infiamna huangah a ni a, chetsual leh intihpalh chu a awm thei. Thil thleng te kha chu a ṭha lo zawnga hriatreng a ṭul lem lo, a hunah chuan Max-a hi ṭha taka biak pawh ka hreh lo bawk a ni," tiin a sawi.

Driver pahnih te hi season tharah pawh en bik hlawh an ni dawn a, inelna sang leh hlauhawm a nih avangin khawvelin a ngaihven ṭhin. Champion lai Verstappen hian kum dang aiin eltu a ngah zual dawn ni pawhin a lang.