Tomiyasu tan season a tawp

Arsenal defender Takehiro Tomiyasu chu a khup hliam zai a ni a, tun season chungin Japan international hi a inkhelh hman a beiseiawm tawh loh - club lam erawhin a chawlh chen tur an la puang lo thung.

Kum 26 mi Tomiyasu chuan, "Tun hnai khan ka khup hliam chu zai a ni a, tunah hian ka dam leh thuai theih nan ka inenkawl ṭan mek a ni. A nihna takah chuan hetianga hliam nat hi ka la nei ngai lo.

"Infiammi tan chuan hliam na tak neih hi a hrehawm a, tun anga hun hrehawm hi ka inkhelh hun chhungin ka la tawng ngai lo, chutihrualin ka beidawn san mai dawn lo tih erawh ka sawi lang duh," tiin a sawi.

Japanese defender Tomiyasu hian kum 2021 khan Bologna aṭangin Arsenal hi a zawm, season hmasa khan match 30 ngawt a khelhsak. Hliam vangin a buai ngun a, tun season kal laiah chuan Premier League bikah minute ruk bak a la inkhel lo.

North London club hian hliam vanga player chhawr theih loh an ngah, tun hnaiah pawh Tomiyasu hma hian Kai Havertz leh Gabriel Jesus te chu hliam vang bawkin an lo zai tawh a ni.

Mikel Arteta naute hian Inrinni zan dar 8:30 hian Premier League khel turin West Ham an mikhual ang.