Match hmasa berah Djokovic a tla

Novak Djokovic tan kum ṭha a ni thei rih lo - Serbian star hian Thawhlehni zan khan Qatar Open a match hmasa ber a khel a, a khingpui Matteo Berrettini lakah a chak lo nghal a ni.

Grand Slam vawi 24 champion tawh Djokovic hian Andy Murray chu a coach nghet a nih tur thu a puang a, a hnua a match hmasaah erawh beisei a phak rih ta lo - Berrettini tan Djokovic a hnehna hmasa ber a ni hial.

World number 6 pawh lo ni tawh Berrettini chuan, "Tun hmain tournament pawimawh leh inelna lian tak takah kan lo inhmachhawn tawh ṭhin, a chak lo zawkah ka ṭang ziah.

"Engtik niah emaw chuan khawvela player ṭha berte zinga mi hi ka la hneh ve ang tiin ka ngaihtuah ṭhin, ka tan chuan tun match kher hi chu hriatreng tawh tur a ni ang," tiin a sawi.

World number 35 Berrettini hi nikum khan a khel ṭha a, a kum tam deuh tawh mah se tun season kal laiah pawh beisei a nei sang chho dawn, a match lehpekah chuan Dutch tlangval Tallon Griekspoor a hmachhawn ang.

Djokovic tan erawh hun duhawm a her chhuak thei rih lo. Beiseina sang tak nen Australian Open kha khel mah se hliam vangin a khel tluan thei lo a, tunah pawh a beisei ang result a nei thei rih lo.

ATP Tour Title 100 la turin vawi khat champion a la hmabak a, tunah chuan clay court season atan rilru a hman chhoh a ngai dawn, coach Murray nen ngun takin ngaihtuahna an hman a ngai ang.

Kum 37 mi Djokovic chuan, "A tir aṭangin na leh harsatna ka nei lo, tun ṭum kha chu player ṭha leh chak phu zawkin min hneh a ni. Ka ṭhat dan takin ka la khel chhuak rih lo tih chu phat rual a ni lo e," tiin a sawi.

A awlsam loh thu sawi zuiin Djokovic chuan, "Kum 15 liam ta vel leh tunlai boruak hi chu a danglam tawh a ni, a bik takin ka taksa dinhmun hi ni tin ka ngaihchan a ngai tawh a, ka theihna sang ber lantir leh tumin theihtawp chu ka chhuah ang," a ti.