Sinner chungchangah WADA insawifiah

Infiammiten damdawi hman phal loh an hman nge hmang lo endiktu World Anti-Doping Agency (Wada) chuan, tun hnaia an hrem tak Jannik Sinner chuan a duh reng vanga tisual a nih loh thu an sawi.

Nikum khan Sinner hian endikna vawi hnih a paltlang zo lo, tun hnai khan hremna tichhuakin thla thum chhung inkhel thei lo tura tih a ni - Italian tlangval hian hremna a hmang mek; French Open hmain a lo kir leh hman dawn a ni.

Damdawi hman phal loh laka fihlim si lo, mahse thla thum chauh hrem a ni hian sawi zui a hlawh - world number 1 hlui Novak Djokovic leh Russian tlangval Daniil Medvedev te chu ṭawng chhuak ring zinga mi a ni hial.

Grand Slam vawi thum champion tawh Stan Wawrinka chuan, "Infiamna dik leh thianghlim hi a awm theih ka ring lo," tiin social media lamah a lo ziak tawh bawk a, thil tisual hremna a inthlauh ṭhin em avangin an sawisel hi a mak lo.

WADA general counsel Ross Wenzel chuan, "Tun ṭuma thil thleng hi chu hre reng chunga dan bawhchhiatna te nen chuan khaikhin chi a ni lo, chhim leh hmar ang maia inpersan leh thuhmun lo a ni tih ka sawi ngam.

"Mi ṭhenkhat chuan an duh vang reng ni loin thil an tisual ve palh thei a, hei chu keini lam pawhin rilru zau takin kan ngaihtuah ṭhin," a ti. A thusawi hi infiammi ṭhenkhat chuan an ring ngam lo ngeiin a rinawm.

Serbian star Djokovic chuan, tuna thil thleng avang hian tennis player tam tak chuan WADA leh International Tennis Integrity Agency (ITIA) te an hmuh dan a danglam a rin thu a lo sawi tawh a ni.