Roma-in Porto mikhual dawn

Europa League knockout playoff-ah AS Roma chuan zanin dar 11:00 hian FC Porto an mikhual dawn a, team pahnih hi first leg-ah 1-1 in an lo inhnehtawk tawh - mahni muala khel tur Italian club-in chak an tum ang.

Roma hian tun season-ah beisei an phak lo a, coach pathum an nei tawh - club legend Daniele De Rossi hoa season bul ṭanin, an ban hnuah Ivan Juric an la lut leh a, mahse, ani pawh hi November 10-ah an ban.

November 14 khan club manager hlui, coaching hna chawlhsan tawh Claudio Ranieri chu pui turin an thlem kir a, Italian coach hoin hma an sawn leh tawh hle.

Ranieri hian league bikah match 13 kaihruai tawhin, vawi thum chiah an tlawm a, vawi thum draw neiin, vawi sarih hnehna a chanpui - Europa League bika league stage-ah match li a kaihruai hman a, vawi hnih a chakpui.

Vawi khat chiah tlawmin, vawi khat an draw a, a enkawl hmaa match khat chiah chak kha knockout playoff khel turin a hruai kai - first leg-ah 1-1 in Porto an inhnehtawkpui a, khualmuala inkhel an nih avangin zaninah result ṭha zawk an beisei ang.

Roma tan Bryan Cristante leh Alexis Saelemaekers te chu hrem vangin an inlan thei dawn lo a, an league match hnuhnung bera hliam vanga lakchhuah ngai Gianluca Mancini erawh inlan thei leh tawh tura beisei a ni.

Italian club hian tlarhmaa khel turin Artem Dovbyk leh Paulo Dybala an nei a, Porto laka goal khung turin an ṭha tawk. Kum 27 mi Dovbyk hian tun season inelna hrang hrangah match 33 khelin goal 13 a khung tawh a, assist vawi li a nei bawk.

Kum 30 mi Dybala hian match 30-ah goal ruk khungin, assist vawi thum a nei a, Argentine forward hi Parma lakah hliam vangin inlan lo mah se, zaninah erawh Ranieri-a'n chhawr a tum.

Leicester City tana Premier League nomawi chawitu coach chuan, "Paulo a ṭha tawh a, Porto a hmachhawn thei ang," a ti a, a player dinhmun a ṭhat tawh thu a sawi.

Porto-in beisei angin season an hmang bik lo - Roma ang thoin coach pathum an nei tawh! Vítor Bruno hoa bul ṭanin, January 20 khan an ban a, José Tavares chuan coach lailawk nia enkawl zuaiin, January 27 aṭang khan Martin Anselmi hnuaiah an khel.

Mahse, Anselmi hian league match thum a kaihhruai tawhah vawi khat chiah a la chakpui a, vawi hnih draw an nei. Europa League-a league stage-a a kaihhruai chhunah 1-0 in a chakpui a, playoff-ah Roma an draw zui - zaninah an chak chuan team boruak a nung thar ang.