Ferrari laka beisei nei sang Hamilton

Lewis Hamilton chuan a team thar Ferrari lakah beisei a nei sang hle - Formula 1 season thar an hman turah a team nen chuan sang tak an thlen theih ngei a beisei thu a sawi chhuak.

British tlangval Hamilton hian Mercedes nen hlawhtlinna tam tak a lo chang tawh ṭhin, mahse, season hmasa tawp rual khan a team hi chhuahsanin, Italy rama hmunpui nen Ferrari a zawm ta zawk a ni.

World champion vawi sarih ni tawh Hamilton chuan, "Formual 1 driver te chuan car sen (red) khalh kan chak ṭhin, tunah chuan chutiang tihhlawhtlin theihna remchang chu ka nei ve dawn ta.

"Ka tan chuan thil engkim mai hi a thar vek ang a ni a, car intlansiakna huangah tawnhriat lo nei tam tawh mah ila Ferrari nen chuan thil thar zel a ni, hei vang tak hian season thar pawh ka nghakhlel," tiin a sawi.

Hamilton hi kum 40 mi a ni tawh, a vanglai a pel tawh tih chu a chiang. Champion tam lamah Michael Schumacher nen an intluk mek a, khum theihna remchang nei dawnin lang mah se Max Verstappen chuan a kawng a lo dalsak ṭhin.

Kum 27 mi Max Verstappen hi vawi li champion tawh a ni a, tun season lo awm turah pawh hian Red Bull driver hi rinkai a ni dawn. Hamilton-a'n record thar siam a duh bakah, a record ṭha rawn thai chhe thei tura ngaih Max-a lo dan a tum tur hi F1 ngaina tute tan chuan en châkawm tak a ni ngei ang.