Nadal-a'n hahdam taka awm a phu - Alcaraz

Carlos Alcaraz chuan naupang a nih lai aṭanga a ngaihsan tak mai Rafael Nadal-a'n tennis a chawlhsan hnuah hahdam taka awm a phu tih a sawi a, an inbiak zui rih lo thu a sawi bawk.

Player pahnihte hi Spain tan Davis Cup-ah an inlan a, an chak loh hnuah Nadal hian inkhelh a chawlhsan fel ta bawk. Spain tan chaun chânna lian tak a ni a, kum naupang zawk Alcaraz te kutah an ram a innghat ve ta thung.

Kum 21 mi Alcaraz chuan, "Rafa chanchin ka sawi zui tam loh avangin zawhna ka dawng hnem a, mi tan kan pahnih inkar ṭha lo leh dik lo awm anga an sawite pawh ka lo hre hial.

"Ani nen khan buaina kan nei lo, buai chhan tur pawh a awm lo. Spain tana mi bik a ni a, a kianga kan khel ve thei pawh kha chawimawina a tling, a hunlai kha kan ram ropui lai tak a ni tih pawh kan pawm.

"Inkhelh a chawlhsan a, keini hoina kan lo va biak buai reng kha a remchang lo, a chhan chu hahdam leh nuam ti taka hun hman a phu a, a chawlhna a la rei loh avangin nuam taka hun hmang turin ka duhsak zawk," a ti.

Spanish star Nadal kha a vanglai chuan player ropui bik a ni a, inelna lian Grand Slam title ringawt pawh 22 a la tling a, major tournament champion tam lamah Novak Djokovic (24 titles) chauh tluk loh a nei.

Tun dinhmunah Spanish tlangval zinga Nadal hnung zui thei hnaivai chu Alcaraz hi a ni a, ani hian Grand Slam nomawi pali a chawi tawh, a kum rualpui zinga champion tam niin a lakah beisei an nei sang hle.