Mohammedan khelmualah Jamshedpur FC

Indian Super League-ah Thawhṭanni leh Thawhlehni zan kha chawlh a ni a, nizan aṭangin khelh ṭan leh a ni - Hyderabad-in Mumbai City mikhualin, result kan hre hman lo a, zanin dar 7:30 hian Mohammedan SC chuan Jamshedpur an mikhual dawn bawk.

Table mawngphah luahtu Mohammedan hian tun season-ah khelh chhan an nei tawh lo a, Jamshedpur erawh a sang zual pahnih zinga tel phak a, direct-a semifinal luh la beiseitu an ni - table-ah pathumna an ni mek.

Men of Steel hian league match li khelh an la hmabak a, pahnihna FC Goa hi point ngain an la phak lo mek. Khalid Jamil-a naute tan Goan club hi um phak theih an la ni a, an chetsual loh phawt a pawimawh thung ang.

Mohammedan hian Mizoram player an kawl nual a, captain Zodingliana Tochhawng, Joe Zoherliana, Vanlalzuidika Chhakchhuak leh Lalremsanga Fanai ten hmun pawimawh an chang ṭhin a, tun hnaiah Lalrinfela Khiangte a inlan ṭhin bawk.