Copa America Final duhthusam : Chile Vs Argentina
Copa America thlengtu Chile leh Lionel Messi captain-na hnuaia khel Argentina ten Inrinni zan dar 2:30 khian Estadio Nacional, Santiago-ah final an khel dawn, Sony Kix-ah live a ni ang.
South America football inelna sang berah Chile-in vawi li final lut tawh mah se champion an la nei lo. An khingpui tur Argentina hian vawi 14 zet nomawi an chawi tawh a, amaherawhchu 1993 hnuah an la champion lo.
Head to Head
Chile hian Argentina nena an inkhelh hnuhnung vawi 16-ah vawi khat chiah chak an nei a, kum 2008 khan 2010 FIFA World Cup qualifier-ah 1-0 in an chak. Ram pahnih hi vawi li an inhnehtawk a, Argentina vawi 11 an chak.
Chile an ṭha
Inelna thlengtu Chile-in group stage-ah goal 11 an khung a, knockout stage-a an goal thum khung nen goal 14 an khung tawh. Chile tan season hman zawh taka Queens Park Rangers-a loan-a khel Eduardo Vargas-a'n goal li a khung tawh.
Final hi Santiago-ah khelh a ni dawn a, kum 25-a upa Vargas-a pianna khua a ni. Goal thum khung tawh Arturo Vidal hi inelna neih laiin car chetsualna vangin hmingchhe deuh mah se field chhunga a chetṭhat miau avangin Chile mipuite ṭan rawn a ni. Juventus midfielder hi Europe club lianten lak luh tumin an hel mek a, a hlutna ti sang turin final-a a chet ṭhat a pawimawh ang.
Chile hian tlar hmaah Alexis Sanchez an la nei bawk. Arsenal forward Sanchez hian goal khat chiah a la khung a, chutichung chuan Argentina defender-te chuan Vargas aiin Barcelona star hlui hi an veng uluk zawk ang.
Tin, midfield-ah Jorge Valdívia an nei a, Barcelona goalkeeper Claudio Bravo an kawl bawk a, tuna Chile team hi golden generation tia hminglem pek an ni.
Final-ah hian Uruguay forward Edison Cavani laka chemawi lo defender Gonzalo Jara hrem vangin a tel thei lo a, player dang erawh an dam kim. Chile-in an stadium-ah final an khel dawn a, player an neih ṭhat ṭum a ni a, tun hi champion theihna hun ṭha a ni.
Chhandamtu Messi
Argentina-in Angel di Maria, Sergio Aguero leh Javier Mascherano te bakah player langsar tak tak an nei ṭeuh a, amaherawhchu ram mipui innghahna chu Lionel Messi a ni.
Team captain Messi hian match hmasa bera Paraguay an khelh ṭuma penalty a khung bak a la pet goal leh lo. Goal khung hnem vangin Barcelona star a ropui a, Copa America-ah field chhunga a chetṭhat vangin a hmingṭha thung. Messi hi semifinal-a Paraguay 6-1 zeta an hneh ṭumin goal a khung lo nachungin man of the match a thlan a ni.
Kum 28-a upa Messi hian La Liga-ah Barcelona vawi sarih a champion pui a, Champions League nomawi vawi li a chawi pui tawh bawk. Argentina captain thiam zia hi fiah ngai tawh lo mah se inelna liana an ram a la champion pui loh avangin a hlawhtlinna chan tawh hi a la famkim lo.
Messi hian Copa America vawi thum a khel tawh a, match 15 a khel tawhah goal thum a khung a, assist vawi sarih a nei bawk. Barcelona forward hian FIFA World Cup pawh vawi thum a khel tawh bawk; match 15 a khelh tawhah goal nga a khung a, assist vawi thum a nei. FIFA World Cup hnuhnung berah rinkai zawk Germany hneh loin an tlawm a, Copa America final-ah erawh rinkai zawk an ni a, chak loh nawn chuan ropuina lamah Argentina legend Diego Maradona tluk lohna lai lian tak a nei reng dawn tihna a ni.
Lionel Messi chuan, "Goal ka la khung tam lohna chhan hi Pathianin final atan min khek sakah ka ngai hmiah. Chutihrualin ka teammate-ten goal an khung a nih pawhin pawi tihna ka nei lo, champion hi ka duh ber a ni. FIFA World Cup-ah final kan thleng tawh a, Copa America-ah hian champion turin beiseina kan nei sang hle," tiin a sawi.
FINAL KALKAWNG
CHILE
Groupstage
2-0 Ecuador
Scorer : Vidal 67'; Vargas 84'(P).
3-3 Mexico
Scorer : Vidal 22', 55'(P); Vargas 42'.
5-0 Boliva
Scorer : Aranguiz 3', 66'; Sanchez 37'; Mendel 79'; Raldes 86'(OG).
Quarterfinal
1-0 Uruguay
Scorer : Isla 81'.
Semifinal
2-1 Peru
Scorer : Vargas 42', 64'.
ARGENTINA
Groupstage
2-2 Paraguay
Scorer : Aguero 29'; Messi 36'(P).
1-0 Uruguay
Scorer : Aguero 56'.
1-0 Jamaica
Scorer : Higuain 11'.
Quarterfinal
0-0 Colombia
Penalty-ah Argentina 5-4 in an chak.
Semifinal
6-1 Paraguay
Scorer : Rojo 15'; Pastore 27'; Di Maria 47', 53'; Aguero 80'; Higuain 83'.