Aizawl FC-in I League squad an puang

Nimin khan Aizawl FC chuan I League khel tur squad an puang a, player 30 hming tarlan zingah foreigner pathum an awm. Mizo club hian East Bengal aṭangin an club aṭanga inzir chhuak Brandon VL Remdika an la let bawk.

India rama football inelna sang pahnihna I League hi January 9 aṭangin Kolkata-ah khelh ṭan a ni dawn. Team 11 khel tur zingah I League ropui laia champion thei Aizawl FC chu club langsar zinga mi an ni a, Mizo club hian match hmasa berah January 9 tlai dar 4:00-ah Roundglass Punjab an hmachhawn dawn.

Kumin inelnaa inhmachhawn turte chu Aizawl FC, Chennai City, Churchill Brothers, Gokulam Kerala, Indian Arrows, Mohammedan, Neroca, Punjab FC, Real Kashmir, Sudeva leh Trau te an ni.

Indian Super League-ah Mizo 30 an awm a, I League-ah erawh Mizo club Aizawl FC zarah Mizo tam zawk an awm a beiseiawm. Aizawl FC ringawt hian Mizo player 27 an thawh dawn.

Position tinah Mizo player ṭha an awm a, Chhinga Veng FC tlarhnunga inkawp ṭhin Vanlalzuidika Chhak-chhuak leh PC Laldinpuia te pawh squad-ah an awm. Mizo midfielder ṭha mi R. Malsawmtluanga'n I League a khel turte hi a nghahhlelhawm a, H. Lalmuankima'n hliam a pumpelh theih a nih chuan Brandon VL Remdika nen tlarhma an tichak khawp ang.

India ram football inelna sanga che ṭha tur chuan foreigner neih a ṭul a, Mizo tlangvalte pui turin hnamdang pathum lak an ni. AFC hian captain Alfred Kemah Jaryan leh defender ṭha Richard Kasagga an chelh bakah Neroca leh Trau tana khel tawh Princewill Emeka an lalut a ni.

Covid-19 vangin Mizoram Premier League khelh a ni lo a, Aizawl FC-in an duh ang player an thlan theih bakah training-na hun ṭha an nei. Head coach Henry Stanley Rozario-a'n training pui thei lo mah se Mizo coach ṭha ber zinga Lalsangzuala Hmar an lalut a, MPL-a Chanmari FC leh Chhinga Veng FC champion pui tawhtu coach ho hian RG Stadium-ah training an nei ṭha hle.

I League khel turin Aizawl FC an inpeih tawh. Kumin inelna hi hmun khatah chauh neih a ni dawn a, Kolkata khawpuia stadium pathum Vivekananda Yuba Bharati Krirangan (Salt Lake Stadium), Kalyani Municipal Stadium leh Kishore Bharati Kriranga-ah te khelh a ni ang.

Inelna kalphung pawh a dang hret dawn. Team 11 te hi vawi khat an inkhel chhuak ang a, hemi zawh hian a sang parukin champion tur an zawng ang a, a hniam pangain tla tur an zawng thung ang.

Goalkeepers

H. Lalremruata        ITI Veng

Lalmuansanga        Bethlehem Vengthlang

Zothanmawia            College Veng

Defenders

Juuko Richard Kassaga            Uganda

K. Lalmalsawma                       Bethlehem Vengthlang

Lalchungnunga                        Durtlang

C. Lalrosanga                         Chaltlang

Vanlalzuidika Chhakchhuak    Pukpui, Lunglei

PC Laldinpuia                            Samthang

Lalthakima                                Khawzawl

Lalfelkima                                Durtlang

Lalmawizuala                            Nisapui

Midfielders

Alfred Kemah Jaryan            Liberia

K. Lalhmangaihkima            Tuithiang Veng

Peter Lalduhawma                Reiek

Ramhlunchhunga                Kolasib

B. Rohmingthanga                Lunglei

Lalengmawia                        Kawnpui

R. Malsawmtluanga            Darlawn

Joseph Vanlalhruaia            Hnahthial

David Laltlansanga                Chawnpui

Brandon VL Remdika            Hunthar

Lalmuanzova                        Kanhmun

H. Lalmuankima                    Bawngkawn

Forwards

Princewill Emeka Olariche     Nigeria

David Lalhlansanga                 Vairengte

F. Lalremsanga                         Lengpui

MC Malsawmzuala                    Siaha

Lalrammawia                            Bethlehem Vengthlang

Lalliansanga                            Durtlang

Coaching Staff

Head Coach            Henry Stanley Rozario

Asst Coach            Lalsangzuala Hmar

Manager                Vanlalhruaia Sailo

Asst Manager     Gosen Rammawia

Asst Manager     Nicky Malsawmtluanga

Physiotherapist   Lalrinsanga Rokhum