Formula 1 An ramah Hamilton a che ṭha thei ang em?

Kum 2015 Formula 1 intlan­siak chuan a boruak san lai ber a tawng chho mek. Pathianni hian tun season-a intlansiak vawi kuana ni turin British Grand Prix an tlan ang.

Khawvela Formula 1 intlan­­siak an ngaihhlutna ber hmun tih ngam England-ah hian Silverstone Circuit-ah an intlansiak leh dawn. Fans an tam ṭhin em avangin hmun dang zawng aiin ngaihven a hlawh leh zual tura ngaih a ni nghe nghe.

Kum 1950 aṭang khan England-ah hian car intlansiak hi an lo nei ṭan daih tawh. British Grand Prix leh Italian Grand Prix te hi khawvela Formula 1 inelna nei hmasa leh upa ber te an ni.

Nikumah khan he hmunah hian khawtual tlangval Lewis Hamilton chuan hnehna changin a champion zui bawk. Kum 2008 pawh khan Hamilton hian hnehna lo chang tawhin a vawi thum nan hnehna a chang leh thei ang em tih chu ka hmu thuai dawn e. Kuminah pawh hian chak tura rinkai ber a ni leh mek bawk. Season hmasa khan Mercedes driver Nico Rosberg chuan pole position aṭangin bul ṭan mah se a intlansiak tluan thei lo thung.

Silverstone tlankawng hi 5.891-km a thui niin lap 52 an tlan ṭhin. Kum 2010 khan he tlankawng hi kawng hrang hranga tih changtlun a ni. Kawng ngil thui tak car nei ṭha tana hman ṭangkai tham a awm avangin car neih ṭhatin awmzia a nei thui thei viau.

Khua a ṭha a nih chuan hmun dang zawng aiin driver-te pawh an tlanchak zawk leh ngeiin a rinawm a, a tlangpui thuin 150mph a chakin an tlan ṭhin.

Anmahni rama tlan tur an nih avang leh world champion lai a nih vanga mipui mit fukna tur Hamilton chuan, "Tunkar tawp chu Williams leh Ferrari nen kan inel leh ngei ang. Driver-ah chuan ka ṭhianpa Nico hi ka elpui ber tur a nih ka ring. Ka rindan chuan ani hi a tlan chak hle ang. Silverstone tlankawng hi hmun dang zawng aia tlan chak theihna hmun a nih avangin ani umphak hi a harsa dawn," tiin a teammate nen an inel leh a rin thu a sawi.

Rilru paukhauh put a ma­mawh thu sawiin German driver kum 30-a upa Rosberg chuan, "Formula 1 intihsiaknaah hian driver ropui leh ṭha tak takte nen kan inel avangin rilru leh taksa paukhauh tak kan neih a ṭul hlein ka hria. Mi ṭha tak tak kara a ṭha ber ni tur chuan huaisen taka beih ngam a ṭul ṭhin," a ti.

Tun season intlansiak vawi riat an neih tawh aṭangin British driver Lewis Hamilton hian point 169 hmuin hmahruaitu a ni mek a, a hnung chiahah hian amah aia point 10-a hniam zawk Rosberg a awm thung. Formula 1 champion vawi li lo ni tawh kumin aṭanga Ferrari car khalhtu Sebastian Vettel chuan point 120 hmuin pathumna din­hmun a luah mek bawk.

Team construction-ah chuan Mercedes leh Ferrari te hi tun dinhmunah chuan tuma el phak lohin an chungnung hle.