Hmeichhe World Cup a hmawr an bawk hnai

Canada-a khelh mek Hmeichhe World Cup chu a hmawr an bawk hnai telh telh a, chanchin thar langsar tak tak a awm nual. Thawhṭanni zing dar 4:30-ah Japan leh USA-in final an khel dawn a, final hi FIFA president Sepp Blatter-a'n a chhim hman dawn lo. Hetihlai hian Golden Ball dawng tur nominee tihchhuah a ni ta bawk.

Final-ah Blatter inlan thei dawn lo

FIFA president Sepp Blatter chu Hmeichhe World Cup final Thawhṭannia khelh turah a inlan thei dawn lo.

Kum 79-a upa Swiss pachal hian Canada khawpui Vancouver-a khelh tur Hmeichhe World Cup final hi en ngei tumin ruahmanna siam lawk mah se a dawn hnaiah a ṭhulh san leh ta zawk a ni.

Blatter-a ukil Richard Cullen chuan Blatter aiawh tur hian FIFA senior vice-president Issa Hayatou chu Canada-ah hian a kal tur thu sawiin Blatter leh a aiawha kal tura an ngaih FIFA general secretary Jerome Valcke te chu Zurich khawpuiah an hna laklawh vanga an zin chhuah theih loh thu an sawi.

Blatter hian kum 1998-a FIFA president a nih hnuin Hmeichhe World Cup final-ah trophy a la sem lo ngai lo a, tun hi a vawi khat sem lohna tur a ni ang.

FIFA president a nih hmaa kum 17 chhung FIFA general secretary hna lo chelh tawhtu Blatter-a'n Hmeichhe World Cup final a chhim loh chhan tur hi tun hnai FIFA eiruk thubuai vang nia sawi a awm bawk a, hetiang boruak karah hian Blatter chuan eirukna laka a fihlim thu leh ringtu ṭha tak a nih thu a sawi.

Blatter chuan, "FIFA-a eirukna thubuai a awm vang maia eiru anga min ngaite hian an tisual a ni. Eiru a min puhtute hi jail tang tlak an ni," a ti.

Ringtu ṭha tak a nih thu sawiin Blatter chuan, "Ka rinna hian chakna min pe a ni. Sakhaw mi tak leh ṭawngṭai hnem mi ka ni a, inah phei chuan Pope Francis-a'n mal a sawm hnu ngat rangkachak aṭanga siam kross ka nei a ni," tiin a inti sakhaw mi hle.

Sepp Blatter chuan a thih hunah pawh vanram a kal ngei tur thu a sawi nghe nghe.

Golden Ball nominee tihchhuah a ni

Hmeichhe World Cup khelh chhunga player ṭha ber hnenah Golden Ball award pek ṭhin a ni a, FIFA chuan he award dawng thei tur hming pariat a tar chhuak.

Hming chhawpchhuah zingah England defender Lucy Bronze a langsar a, kum 23 leka upa nichunga nominee a ni phak hrim hrim hi a ropui hle.

Beisei anga che ṭha lo Germany team aṭangin Celia Sasic hming a lang a, kum 27-a upa striker hian kumin Hmeichhe World Cup-ah goal ruk khungin top scorer a ni mek.

Final khel tur Japan leh USA-in an thawhhlawk a, player pathum ngawt thawhin Chicago Red Stars defender Julie Johnston, kum 32-a upa midfielder Carli Lloyd leh kum 29-a upa Megan Rapinoe te an thawh a, anni pathum hi USA-in final an luh theihna turin an thawhhlawk hle.

Champion lai Japan-in defender Saori Ariyoshi leh captain Aya Miyama te an thawh a, France defensive midfielder Amandine Henry hming a lang tel bawk.

China midfielder Jiali Tang, Norway forward Ada Hegerberg leh Canada defender Kadeisha Buchanan te chu young player award dawng thei tura an hming chhawpchhuah a ni bawk.