Europa League A bul ṭan nan West Ham chak

Ningani zan khan West Ham chuan an khelmualah Lusitanos chu 3-0 in an hneh. Europa League group stage qualifying first leg inkhelah hian striker Diafra Sakho chuan goal hnih a khung. Second leg hi July 9-ah khelh leh tur a ni.

Premier League club Hammers hi season hmasa khan Premier League-ah 12 chauh ni pha mah se England club zingah Fair Play-ah point an hmuh san ber vangin Europa qualifier hi an khel thei a ni.

West Ham hi manager thar Slaven Bilic-a'n a kaihruai lo a, academy manager Terry Westley hnuaiah Europa League qualifier hi an khel. London club tan French striker Sakho-a'n first half-ah goal hnih a khung a, inkhel chawhnu lamah James Tomkins chuan goal khat a khung ve bawk.

Ningani zan hian Hammers tan midfielder Reece Oxford chuan inkhel bul a ṭan. England Under 17 captain hian Billy Williams record khumin kum 16 leh ni 198 chauha upa niin West Ham tana khel thei naupang ber a ni. A club tana senior level-a a inlanna hmasa berah Oxford hi khel ṭha mah se a vawi khat nan yellow card a hmu nghal bawk.

Upton Park-ah fan 35,000 chuang punkhawmna inkhelah hian manager thar Slaven Bilic-a'n a hmunah inkhel a en a, mipui lawm a hlawh hle. Kum 1996-97 chhung khan kum 46-a upa manager Bilic hian West Ham tan football a lo khel tawh a ni.

An khingpuite khelh dan sawiselin goal hnih khungtu Sakho chuan, "Chak pawh tum ngam lo khawpa dawihzep nena inkhelh chu a hahthlak ṭhin, goal venhim ringawt kan tum a nih chuan kan hlawhtling ngai lo ang. Goal thum aia tam khung thei tur kan ni a, mahse kan chak avangin kan lawm tho," tiin a sawi.

West Ham hi kum 2006 hnu lama Europe-a an inlan lehna hmasa ber a ni.