Wimbledon Federer-a'n hmalam a pan zel

Tennis khawvela sulhnu nei ṭha Roger Federer chuan Wimbledon third round lut turin Sam Querrey chu straight set-in a hneh.

Kum 33-a upa ni tawh mah se Federer hian ala tar lo a ni tih lantirin Ningani zan khan Federer chuan darkar khat leh minute 25 chungin Querrey chu 6-4, 6-2, 6-2 in a hneh a ni. Third round-ah chuan Sam Groth nen an inhmachhawn leh anga, a chak chho zel a nih chuan semifinal-ah Andy Murray nen an intawng thei ang.

Swiss star Federer hian Wimbledon champion nomawi hi vawi sarih zet a chawi tawh a, kuminah hian a vawi riat nan chawi leh tumin kawng dik a zawh mek.

Grand Slam vawi 17 champion tawh Federer chuan, "Tournament bul ṭanna inkhel pahnihah ṭha taka ka khelh theih avangin ka lawm hle. Tournament lianah hi chuan player nem leh khelh awlsam bik a awm tak tak theih tawh loh avangin inkhelh zawng zawngah theih tawp tak meuh chhuah a ngai zel a ni," tiin a sawi.

Murray a chak

Court One-a inkhelah khawtual tlangval kum 28-a upa Andy Murray chuan world number 78 Robin Haase chu 6-1, 6-1, 6-4 in a lo hneh ve bawk. Zanin hian Andreas Seppi nen fourth round luh inchuhin an inkhel leh ang.

Kum 2013 champion Murray hi tun hnaiah grass court-ah a zawnin vawi sarih a chak zawn tawh a, Wimbledon ṭan hma kar khan Queens Club-ah a lo champion tawh bawk avangin a zawna grass court-a champion thei dinhmunah a ding.

Mipa inkhel dangah seeded 13-na Jo-Wilfried Tsonga, seed parukna Tomas Berdych leh seeded 18-na Gael Monfils te chuan an khingpui ṭheuh hnehin third round an lut bawk.

Hmeichhe lamah champion lai Petra Kvitova-i'n second round-a a khingpui Kurumi Nara chu nuamsa takin a hneh. Third round lut turin Cezch star Kvitova hian game hnih chauh hlohin 6-2, 6-0 in hnehna a chang.

Kum 2011 leh 2014 champion Kvitova hian minute 58 chhung lekin world number 57 Nara lakah ace vawi 10 a siam hman. Third round-ah Kvitova hian Jelena Jankovic leh Evgeniya Rodina te inkhela chak zawk a hmachhawn leh ang.

Kum 25-a upa Kvitova chuan, "Nara leh Venus Williams te nikuma an inkhel kha ka lo en tawh avangin inkhel hautak tak ka lo beisei a, mahse vanneihthlak takin inkhel ka thunun thei hlauh. Ka nomawi humhim turin kawng dik ka zawh mek a, ṭha taka inkhelh chhunzawm zel hi ka duhthusam chu a ni," a ti.