Team 'thar' Real Madrid beiseina thar nen

Ni 20 vel liam taah khan Real Madrid dinhmun chu duhawm lo tak a ni - Champions League group stage match-ah an hneh ngei tura ngaih Shakhtar Donestk chu 2-0 in an ngam lo a, last 16 lut lo thei dinhmunah an ding. 

Ukrainian club laka an tlawm hma hian Real hi league match thum chu a zawnin an chak zo tawh lo a, Valencia (4-1) leh Alaves (2-1) laka an tlawm bakah Villarreal (1-1) an inhnehtawkpui. Spanish chanchinbu lar Marca chuan Zinedine Zidane dinhmun a derthawn thu an sawi a, French coach-in media hmaah a ban mai loh tur thu a sawi dum dum bawk. Coach-in a ban loh tur thu a sawi fo chuan ban a hnai tihna a ni a, hetihlaia Zidane dinhmun hi duhawm lo tak a ni - tunah erawh thawnthu a danglam ta. 

Zidane-a'n siamthar lehna sermon pui hluah lo mah se Sevilla lakah 1-0 in a team hnehna a chanpui a, Borussia Monchengladbach lakah 2-0 a chakin Champions League last 16 an lut zui bawk. Real an tlawm leh tawh lo - Atletico Madrid (2-0), Athletic Bilbao (3-1) leh Eibar (3-1) an hneh zui a, tunah chuan hmahruaitu Atletico nen an point hmuh zat inangin champion hial an sawi ri leh ta. Zidane-a naute hian match hnihin an khel tam zawk tih erawh hriat tel a ṭha a, zanin dar 12:15-ah league match khel turin Granada an mikhual leh bawk ang - Granada hian league match hnih chhung chu a zawnin hnehna an chang tawh tih hriat tel erawh a ṭha. 

Real player zingah Eden Hazard-a'n dam lam a pan leh tawh a, Eibar laka inlan lo Vinicius Junior leh Isco pawhin ngai an awh leh ṭan tawh - an inlan erawh a rinawm chiah lo. Granada tan an thiampuipa Maxime Gonalons chuan Real Betis nen an inkhelah tun season-a a yellow card pangana a hmu a, French defensive midfielder hian Real a hmachhawn thei lo ang.