Beisei phak lo Rafael Nadal

Vawi hnih a champion tawhna Wimbledon aṭangin Rafael Nadal chu third round inhlangkai zo loin a tla. Spanish tennis player hian Ningani zan khan Centre Court-ah Dustin Brown a hneh lo.

Grand Slam vawi 14 champion tawh Nadal hian German tennis star Brown chu 7-5, 3-6, 6-4, 6-4 in a hneh lo. Tun tournament-ah hian Nadal hi seeded 10-na niin a hneh loh Brown erawh World number 102-na a ni daih thung.

Kum 30-a upa Brown hian Nadal hi a ngam hrim hrim a ngaih theih, vawi hnih an inkhelh tawhah hnehna ala chang ve ve. Nikum khan Halle Open-ah a lo hneh tawh bawk a ni.

Kum 2008 leh 2010-a a champion hnuah Nadal hi Wimbledon-ah a che ṭha leh tawh lo. Tun hnai kum li chhungin quarterfinal ala lut leh miah lo a, a hneh loh player-te hi world ranking-ah 100-na hnuai lam hlir an la ni vek zui. Kuminah Nadal hi a che chhe tluang hle a, tun tournament hma hian Grand Slam dang pahnih Australian Open leh French Open quarterfinal-ah a tla tawh bawk.

Kum 29-a upa Nadal chuan, "Kum 2008 leh 2010-a ka inkhelh ang khan ka inkhelh leh thei ang ngem tih chu tunah chuan sawi a har ta. Ka tan chuan tun hun hi hun hreawm tak chu ava ni em. Amaherawhchu beidawng tur ka ni lo a, hun hian ka hringnun pawh a herpui ve zel anga ka tan hun ṭha ala herchhuak ve leh ngei ang tih ka beisei," tiin a inkhelah tunhma a phak tawh lo tih chu a hai lo hle.

Brown hi tunge?

Nadal-a hnehtu Brown hi a pa-te ram Jamaica-ah a piang a, anu-te ram Germany-ah kum 1995 thleng khan a awm thung. Kum 1996 khan Jamaica-ah letin kum 2010 thleng khan apa-te ram aiawhin a khel ṭhin.

Kum 2010 khan Germany-ah pem let lehin tun thlengin a la awm. Tennis a khelh hun chhunga a tawn san ve ber lai chuan world number 78 a ni ve hman. Grand Slam-ah hnuhma a la nei lian lem lo a, kum 2013 khan Wimbledon third round a lo lut ve tawh a ni.