Chelsea-ah loan-in Falcao a kal

Premier League cham­pion lai Chelsea chuan Monaco striker Radamel Falcao chu season khat chhung atan loan-in an hawh dawn. Kum 29-a upa Colombian striker hi a chet ṭhat dan a zirin Chelsea hian season tawpah a nghetin an la lut thei dawn a ni.

Khawvela striker hlauh­awm ber pawl ni ṭhin Falcao hian season hma­sa kha loan-in Manchester United-ah a hun a hmang a, vawi 29 a inlanah goal li chiah khungin season tawpah United-in a ngheta lei theihna hun ṭha nei mah se an lei duh ta lo a ni.

United hian Monacoa aṭanga Falcao an hawh manah pound maktaduai 6 sengin kar khatah £265,000 an hlawh tir a, an tisual chiang hle.

Chelsea erawh an fimkhur a, Falcao an hawh manah hian kum 20-a upa Croatian midfielder Mario Pasalic chu loan-in Monaco-ah an kaltir ve thung a, Stamford Bridge-ah hian United-a a hlawh zahve ang vel bak a hlawh dawn lo nia sawi a ni.

Porto striker a nih laia season hniha goal 72 khungtu Falcao chuan, "Chelsea ka zawm thei hi ka lawm takzet a, training hlan ka nghakhlel tawh takzet a ni. League title humhim tur leh Europe-a hlawhtling tura beih thuai thuai ka chak tawh hle a ni," tiin United-a a hlawhtlin loh hnua Chelsea a zawm thei chu a lawm hle.

Chelsea boss Jose Mourinho chuan Falcao hi Europe-a striker hlauhawm ber pawlah a chhuah leh theih thu a lo sawi tawh a ni.