Liverpool beisei sangtu Clyne
Southampton aṭanga pound maktaduai 12-a Liverpool pantu Nathaniel Clyne chuan season tharah ṭha taka an khelh theih a beisei thu sawiin a club thar Liverpool chu Champions League-ah an kir leh ngei a rin thu a sawi bawk.
Tun nipui transfer-a Liverpool player thar parukna Clyne chuan, "Liverpool hian hma kan sawn thei ang tih hi tun hnaia player lut thar aṭangin a chiang a, theihtawp kan chhuah dawn a ni," a ti.
Season hman zawh taka Saints player pawimawh ber pawl Clyne chuan sawi chhunzawmin, "Season ṭan hma tour-ah kan khelh ṭhat a, season bul kan ṭan ṭhat bawk chuan kan kaltluang theiin ka ring. Liverpool te ang club lian tana khel tur hian ka ṭha tawk a, chu chu thudik a nihzia ka hmuhtir dawn che u a ni," tiin a ṭawng pawr hle.
Nipui transfer-ah Liverpool an che na a, season hmasa a an chet chhiat thai bo an tum tih a lang. Clyne an lak luh hma hian free transfer-in Burnley striker Danny Ings, Bolton keeper Adam Bogdan leh Manchester City midfielder James Milner, pound maktaduai 3.5 man Charlton Athletic defender beiseiawm Joe Gomez leh pound maktaduai 29 man Hoffenheim forward Roberto Firmino te an lo la lut tawh a, Aston Villa aṭangin pound maktaduai 32.5 an chhiar striker Christian Benteke chu lakluh tumin an hel mek bawk nia sawi a ni.