Bacca manah AC Milan leh Sevilla inrem

AC Milan chuan Sevilla aṭangin pound maktaduai 21 man Colombian striker Carlos Bacca an la lut dawn. Bac­ca hian contract a sign hmain medical test a la nei leh phawt dawn a ni.

Kum 28-a upa striker hi Premier League club Liverpool, Manchester United leh Arsenal te nen sawizawm ni mah se intuai thar tum mek Italian club Milan lam pan hi a thlang ta zawk.

Bacca hian kum 2013 khan Club Brugge aṭangin Sevilla a pan a, a man atan Spanish club hian pound maktaduai 7 an seng. Sevilla tan match 108 a khelh aṭangin goal 49 a khung a, season hman zawh takah khan in elna hrang hrangah goal 28 lai a khung.

Tun hnaiah Milan an inla ṭha nasa hle a, Bacca hma hian pound maktaduai 14 man mid­fielder Andrea Bertolacci chu Roma aṭang­in an la lut a, Shakhtar Donetsk aṭangin pound maktaduai 5.7 man Luiz Adriano la lut turin inremna an nei tawh bawk.

Brazilian striker Luiz Adriano hian Shakhtar tan kum riat a khelh chhungin goal 129 a khung a, Ukrainian club chanchinah hian amah aia goal khung hnem an la awm lo.

Ukraine-a a cham chhungin Europa League, Ukrainian Premier League title vawi ruk leh cup title vawi li lai a chawi hman a ni.