Tualchhung Transfer Danmawia'n Chanmari FC a zawm

Mizoram Premier League season hmasa bera best player R. Laldanmawia'n Chanmari FC a zawm.

MPL2 champion Chanmari hian Danmawia an lak luh hmain Dinthar FC aṭangin midfielder Johny Lalfakzuala an la lut tawh a, nikum season-a an pla­yer pawi­mawh Malsawmfela, Lalrosanga, Joseph Lalnunpuia, Rochhingpuia leh keeper MS Dawngliana te contract an pawhsei bawk.

Chanmari FC hian head coach H. Vanlalthlanga thlak tur­in Dinthar FC coach HC Zar­­zo­liana an sawm chhuak a, hei vang hian an elpui Dinthar aṭanga Johny leh Danmawia te an la lut hi a mak lo.

2013 ZoFooty Award player of the year Danmawia hian MPL1-ah khan goal kua a khung a, Bethlehem Vengthlang striker thar MS Dawngliana goal khat chiahin a pha lo. MPL2-ah Dan­mawia hian goal sarih a khung a, Mizoram Police winger Lalbiakhlua goal khat thoin a pha lo a, Sialhawk tlangval hian MPL3 khelh zawh takah khan goal nga a khung bawk.

Chanmari FC chuan an facebook page-ah 'Kan vengpa a lo let leh ta' tiin an ziak. Mizoram Police academy chhuak Danmawia hian Chanmari LC team chu Red Ribbon Football 2012-ah a champion pui tawh a, Chanmari Veng-a cheng a nih bawk avangin CFC supporter-te ngainat a hlawh nghal ang.