Nakkumah PVL neih an tum

Mizoram Volleyball Association chuan Pro Volleyball League chu kuminah nei thei lo mah se nakkumah neih an tum. MVA hi nimin khan kumina a hnuhnung ber atan an ṭhukhawm a, season thara an hmalak dan tur hrang hrang an sawiho.

Inelna lian PVL hi May emaw June thlaah emaw neih turin an rel a, tournament hi hri leng laka sorkar inkaihhruaina zawm chunga khelh tur a ni ang. Kuminah hian Covid-19 vangin inelna an nei thei lo a ni.

Tualchhung volleybal thuneitu sangin an rel zingah hian - PVL bakah Inter Branch YMA Volleyball Tournament leh Inter District Volleyball Tournament chu a lian zual an ni. Referee leh coach-te tan intuai tharna hun buatsaihsak an tum bawk.

State pumah club tan player ziahluh hun hawn a ni dawn. Nakkum January 28-29 hian pro division club, district volleyball association leh zone volleyball association ten a rualin transfer hun an hmang vek ang.