AIFF inthlan a awm dawn rih lo

All India Football Federation (AIFF) chuan Thawhṭanni khan annual general meeting chu video conferencing kaltlangin an nei a, meeting chuan Supreme Court aṭanga thuthar a awm hma chu tuna AIFF hruaituten Indian FA hruai hna thawk turin an rel. 

AIFF president Praful Patel chuan, "AIFF inthlan pangngai taka kalpui a nih hma chu tuna executive committee hian sum liantham hmanna leh hmachhawp lianthamah chuan thutlukna a siam lo ang," tiin a sawi. Indian football-a thuneitu sang ber AIFF executive committee member term hi kum li a ni a, ṭum dang ang chu ni se annual general meeting-ah hian inthlan neih tur a ni - President ni lai Praful hi kum 2012 aṭang khan President a ni tawh a, inthlan a hmachhawn nawn thei tawh lo. 

October 2017 khan Delhi High Court chuan December 2016-a AIFF inthlan chu National Sports Code dan zawm loa puhin a pawm lo a, mahse, AIFF hi Supreme Court lamah an zualko. India ram rorelna sang ber hian chief election commissioner hlui SY Qureshi leh  India goalkeeper hlui Bhaskar Ganguly-te chu AIFF constitution thar ruahman turin a ti zui a, hemi chhung hian AIFF executive committee chu an hna thawh a phal.

Mahse, tun thlengin SC-ah consti-tution thar theh luh a la ni lo a, hei vang hian thla hmasa khan AIFF chuan Supreme Court-ah hian Indian football hruai hna chhunzawm an dil a ni. AGM-ah hian Mizoram Football Association vice president Lalsawma Pachuau leh AIFF executive committee member Lalnghinglova Hmar-te chu an tel. MFA vice president Lalsawma chuan, "Praful Patel kaihhruaina hnuaiah football-in nasa takin hma a sawn a, tunlai boruak nen inthlan a buaithlak bawk si avangin, State FA-te chu tuna hruaituten min hruai chhunzawm zel theihna tur kawngah kan inthurual em em a ni," tiin Vanglaini a hrilh.