Hmeichhe World Cup Hlawhchham nawn duh lo England
Hmeichhe World Cup semifinal-ah England hmeichhe team-in champion lai Japan hneh lo mah se Germany lakah an chesual nawn duh lo.
Nimin zingah pathumna dinhmun inchuhin England leh Germany an inkhel a, hun pangngaiah goal a lut lo a, extra time minute 108-naa Fara Williams penalty pet goal hmangin England-in hnehna an chang.
Chenna ngai loh ramah England
Football ngainatna ram ni siin England-in trophy liantham an chawi hleithei lo a, trophy chawi chu sawi loh tournament lianthamah an thleng sang ngai lo hrim hrim.
1990 Italy World Cup-a England mipa team-in semifinal an luh hnuah Hmeichhe World Cup-ah a vawi khat nan England hmeichhe team-in World Cup semifinal an lut ve leh a, final lut zo ta lo mah se pathumna dinhmun hauhin 1966 World Cup-a England mipa team an champion hnua England football-in a tawnsan ber ṭum an tawng.
Hneh theih loh hnehtu England
Lionesses (England hmeichhe team sawina) te hian vawi hnih lai World Cup champion lo ni tawh Germany hi vawi 20 intumah vawi khatmah an la hneh lo a, hun pawimawhah tak an hneh ta thung a ni.
England hmeichhe team player-te an hausa haw nawlh dawn a, World Cup semifinal an luh vanga £12,000 (Rs 11,84,967) an hlawh hnuin pathumna an nih vangin £2,000 (Rs 1,97,494) an dawn belh dawn a ni.
Chawimawi phu Lionesses
An tawn chinah England coach Mark Sampson chuan a player-ten fak an phu thu a sawi a, "Ka ngaihdanah chuan vawiina England hmeichhe team ka enkawlte hi legend an ni a, tunah chuan keimah mai niloin khawvel hmun hrang hrang leh kan ram mipuite ngei pawhin legend-ah an pawm ka beisei a ni," a ti.
Kum 32-a upa English coach chuan sawi chhunzawmin, "Germany hneh hi result duhawm tak a ni. Semifinal result vanga rilru hnual lai takin World Class team Germany kan hmachhawn a, kan khelh dan khan player te thawhrim zia a pholang chiang hle a ni. Ka naute ka chhuang a, kan hneh theih ngai loh Germany kan hneh avangin ka naute hian hriatreng an hlawh tawh ang," a ti.
England hi World Cup khelh dawn khan world ranking-ah parukna an ni a, an hneh tak Germany hi pakhatna an ni thung.