FFP vanga Manchester City hremna an hlip

UEFA-in club tin ten an sum lakluh dan a zira sum an hman dan tur an duan Financial Fair Play dan an bawhchhiat vanga hrem mek Manchester City chu an hremna hlihsak an ni a, an rual hian hrem tuar ve tho French club Paris Saint Germain hremna pawh hlihsak an ni bawk.

Manchester City hi Champions League-a squad member neih theih zat 25 aṭangin 21 lek nei thei tur leh pound maktaduai 16.3 chawi tura hrem an lo ni tawh a, an hremna hi hlihsak an nih takah chuan Champions League-ah pawh club dang ang thoin squad pangngai an nei ve thei dawn tihna a ni.

UEFA chuan Man­chester City leh PSG te chu an hremna hlih sak nimahse uluk taka an thlithlai reng tho tur thu leh club-in sum a hmuh dan a zira pawisa hmang tho turin an hriattir a ni.

PSG president Nasser Al Khelaifi a ṭawng pawr nghal a, Qatari sumdawng hausa chuan, "Kan team-in a mamawh player ṭha ber kan la lut dawn a ni," tiin inrenchem an tum loh thu a sawi.

Kar hmasa khan UEFA executive committee ṭhu­khawm chuan sumdawng hausa te'n football hma­sawn nana an tha an thawh zawk theih nan FFP siam danglam hret tura rawtna chu an lo pawm tawh a ni.