Deeney-a'n Watford-ah contract thar a ziak

Watford striker Troy Deeney chuan kum 2020 thleng The Hornets (Watford sawina) tana khel turin contract thar a ziak.

Kum 27-a upa striker hian season hmasa khan goal 21 a khung a, Premier League-a Watford inhlankai nan a thawhhlawk hle.

Thla hmasa khan Swansea City chuan lakluh tumin an lo hel tawh a, Watford tana khelh zel a thlang ta zawk a ni. English striker hian season thum chhung chu Watford tan goal 20 aia tam zel a khung tawh a, a tih theih ang ti thei hi Watford player zingah an la awm lo.

Hetihlai hian Deeney-a striking partner Matej Vydra chuan a ngheta cham turin Watford-ah contract thar a ziak ve bawk a, Udinese aṭanga season hmasa loan-a Watford-a a hun hmangtu hian kum nga cham turin contract a ziak a ni.

Kum 23-a upa Czech striker hian season hmasa khan Watford tan goal 16 a khung a, Deeney nena an inkawp hi season hmasa championship division-a tlarhma hlauhawm ber pawl an tling pha hial a ni.