Usain Bolt tak tak kan hmu leh thei ang em?

August thlaa China khawpui Beijing-a neih tur World Championship atana inbuatsaih nan thla hnih pawh a awm tling ta lo. Khawvel mihring piang tawh zinga tlan chak ber Usain Bolt-a hi he hun atan hian a inpeih hman ang em? tih chu khawvelin a thlir ta ṭhup mai.

Kar hmasa khan Bolt chuan thla leha neih tur Diamond League-ah a tel theih loh tur thu a lo puang tawh. A tha leh ṭhal bawr na vangin Bolt hi Paris leh Lausanne-ah kan hmu thei dawn lo a ni. Bolt hi German khawpui Munich-ah Dr Hans-Wilhelm Muller-Wohlfahrt-a'n a enkawl mek a, tunhma ang khan ṭha takin a intlansiak leh thei ang em tih chu ngaihtuah tham a tling ta.

Bolt atan kum chhia

Jamaican sprinter tan chuan kumin hi kum ṭha tia chhiar theih a ni lo ang. Kuminah Bolt hian 100m leh 200m-ah intlansiak vawi khat ve ve chauh ala hmachhawn a. May thla khan 100m chu 10.12 seconds chunga a tlan thlen bakah 200m chu 20.13 seconds chhungin a tlan thleng bawk.

Kum ruk liamtaa German khawpui Berlin-a record a lo siam tawh 100m (9.58 secs) leh 200m (19.19 secs)-te chu a pha lo hle. Kumina a record bik chauh pawh hi sprinter nazawngin an tluk loh ni mah se Bolt-a lak aṭang chuan hei aia ṭha hi khawvel mipuiin an beisei a ni.

Chhuanlam tur a nei em?

Nikum khan Bolt hi a ke zai a ni a, vanneih thlak takin nikum khan Olympics emaw World Outdoor Championships emaw pawh a awm loh avangin infiamnaah a chanchin ṭha lo lam kan hre zui tam lo hlauh.

Kuminah inelna hrang hrang a awm chho zel a, hmun ṭhenkhatah a inlan theih loh bakah a inlanna chhunah pawh beisei a phak lo. Nikum lama langsar tak ni lem lo a ke hliam nghawng hi kuminah a langsar ta niin a ngaih theih.

Amah enkawl tu Dr Muller hi infiammi tam takin an lo pan tawh leh lo enkawl dam tawh ṭhin tu a ni. Ani hian kel thisen leh arpa chhuang aṭanga siam damdawi a hmang uar hle. Infiammi a enkawl tawh zingah England midfielder Steven Gerrard, marathon world record siamtu Paula Radcliffe, England cricketer chawlta Alex Tudor leh golf khelh thiam hmingthang Jose Maria Olazabal te pawh an tel.

Tunah hian August thla hma ngeia dam hman turin Dr Mullar hian Bolt hi uluk takin a enkawl mek a, a enkawl dam hman a nih chuan Beijing-ah midangte nena inelna hmachhawn turin Jamaican sprinter hi kan hmu ngei ang.

Beijing-ah kal thei ta se...

August 22 a ṭan tur World cham­pionships-ah hian 100m leh 200m-ah champion lai a nih avangin Bolt hi he inelnaah hian a tel leh thei a nih chuan mipui ngaihven hlawh ber a ni leh lo thei lo ang. Qualifying pawh neih ngai loin a dam a nih phawt chuan a tel thei dawn a ni.

A coach Glen Mills chuan,"Kum 2012 khan hetiang deuh hian kum bul alo ṭan fuh lo tawh a, mahse kum tawp London Olympic-ah erawh a ṭhat zia a pholang leh thei tho. Heivang hian kuminah pawh hian inelna lian thamah chuan 'Bolt tak tak' kan hmuh leh ngei ka beisei. Tunah chuan kan duhthusamin a la dam lo deuh nain nakin lawkah chuan ṭha takin a rawn kir leh ang tih hi ka ring tlat a ni," a ti.

A hautak dawn..

Beijing-ah hian intlansiak turin a kal a nih pawhin Bolt tan hian a awlsam dawn lo tih a chiang. A chhan chu kuminah sprinter ṭhenkhat Gatlin, Tyson Gay leh kum 19 chauha upa Trayvon Bromell te mai bakah Asafa Powell te chuan kum

ṭha tak an hmang chho mek.

American sprinter Gatlin hian kum 2004 Olympic khan 100m-ah gold medal a lak tawh bakah kuminah amah umphak an la awm lo. Kum 33-a upa hian hmanni lawk khan 200m khawvela tlan thleng rang ber palina dinhmun a luah thar nghe nghe. Intlansiak a hmachhawn hnuhnungah a elpuite aiin 100m chu 0.10 second-in a tlan thlen hma bakah 200m-ah chuan 0.36 second zetin an phak lo bawk.

Jamaican sprinter pakhat 100m world record lo siam tawh tu Powell pawn kar hmasa mai khan 9.84 second chhunga 100m tlan thleng­in season duhawm tak a hmang mek.

Sprinter ropui tak tak awmin kuminah che ṭha hlawm hle mah se kan theihnghilh loh tur chu heng ho zawng zawng hian Bolt a record lo siam tawh an tluk lo fai vek tih hi a ni. Khawvel awm tirh aṭangin Bolt chauh hi 100m leh 200m a ruala record kawl kawp thei awmchhun a la ni reng. Kum 29-a upa infiammi ropui hian 2017-a London World Championship neih zawhah chuan infiamna chawlhsan a tum thu a lo sawi tawh nghe nghe.

Khawvela athlete sum hailut hnem bera ngaih Bolt hian mimal chawimawina IAAF World Athlete of the Year, Track & Field Athlete of the Year bakah Laureus World Sportsman of the Year chu vawi thum ngawt a dawng tawh.