Mohamed Salah lakah Fiorentina an lungawi lo
Italian club Fiorentina chuan thuchhuah siamin Chelsea winger Mohamed Salah chuan an inremna anga a vawi hnih nan an club-ah loan-a a khelh duh loh avangin a chungah dan anga hmalak mai an rilruk thu an sawi.
Kum 23-a upa Salah hian January khan loan-in Italian club hi a zawm a, a zawm tirh hian kum khat dang club-in an duh chuan an hawh leh theih ang tih a ni.
Mahse, a loan hun a zo a, contract thar duhawm zawk Fiorentina-in zawrh mah se Viola (Fiorentina sawina) tan vawi 26-a inlana goal kua khungtu Egyptian winger hian contract thar a ziak duh lo a, training a zawm duh lo bawk.
Fiorentina an lungawi lo a, "Kan ukil te kutah kan buaina hi kan hrilh tawh a, hmalak zel dan tur kan ngaihtuah ang," an ti.
Chelsea-in January-a Fiorentina winger Juan Cuadrado pound maktaduai 23.3-a an lei khan Salah hi an inremna angin Chelsea-in Italian club-ah hian loan-in an kal tir a ni.
Fiorentina club thuchhuah chuan, "Salah loan-a kan lak dawn khan kan inremnaah chuan June 30, 2015 thleng kan hnenah a cham anga, club lamin kan duh dan a zira 2015-16 thleng hawh chhunzawmin a nghet pawha la lut thei tur kan ni," tiin Salah nena an inrem dan an puangchhuak.