Wimbledon Third round an zo ta; Federer ala dam
Khawvela Grand Slam Tournament upa ber Wimbledon 2015 chu third round an khel zo ta a, vawiin tlai aṭang hian last 16 hi khelh chhunzawm nghal a ni ang. Vawi sarih champion tawh Roger Federer chuan a match hnuhnung berah Sam Groth a hneh.
A service a nat em avangin Australian star Groth hi seeded pahnihna Federer tan khelh a harsa a, mahse a tawnhriat leh thiamna hmangin 6-4, 6-4, 6-7, 6-2 in Federer a chak ta tho a ni.
Kum 27-a upa Groth hian Federer nen an inkhelh ṭum hian 147mph zet a nain a service a, hei hi Wimbledon inkhela service na ber dawt record a ni nghe nghe. Service na ber chu Taylor Dent niin kum 2010 khan 148mph-a nain a lo service tawh.
Swiss star seeded 2-na Federer chuan, "Wimbledon a nih tawh hi chuan hmun dang ai chuan a boruak hi a dang bik ṭhin. A bul ka ṭan ṭhat vangin a thawhkhatna chu ṭha takin ka zo thei a, chawlhkar hnihna a chet
ṭhat chhunzawm hi a pawimawh dawn. A service a nat em avangin inkhelh a harsa hle a, mahse ka service ka hum ve tlat avangin hnehna ka chang a ni," tiin a sawi.
Mipa champion lai leh champion leh tura beiseiawm ber ni mek Novak Djokovic chuan Wimbledon a khelh tawha unforced errors a neih tlem ber ṭum tawngin Australian star Bernard Tomic chu awlsam takin 6-3, 6-3, 6-3 in a hneh.
World number 1 Djokovic hian third round-a a khingpui Tomic lakah hian vawi 12 chauh unforced errors neiin set khat mah a hloh lo a ni.
Inkhel dangah French Open champion lai Stan Wawrinka paw'n harsa lo takin Fernando Verdasco lakah 6-4, 6-3, 6-4 in hnehna a chang ve bawk. Kum 30-a upa backhand nei ṭha tak mai hi Australian Open-ah pawh a lo champion tawh bawk.
Inrinni tho khan Centre Court-ah British mipui ṭhahnem tak chu an khawtual tlangval Andy Murray inkhel enin an pungkhawm a, an duh leh beisei chak result an hmu.
Seeded pathumna Murray hian a darah hliam nei deuh mah se last 16 lut turin Andreas Seppi lakah 6-2, 6-2, 1-6, 6-1 in hnehna a chang ta tho. Hnehna chang turin Murray hian darkar hnih leh minute 10 a mamawh a ni.
Kum 2013 champion Murray hi a hliam vang hian set linaah enkawl a ngai hial a, hemi set hi a hloh chiang hle nghe nghe. Mahse, a hliam enkawl a nih hnuah na taka service leh thei in set huhnung berah chuan game khat chiah a hloh leh thung.
Williams unau an kal zel
Hmeichhe lamah vawi nga champion tawh Venus Williams chuan Aleksandra Krunic chu 6-3, 6-2 in a hneh a, last 16-ah a unaunu Serena Williams nen an intawng ang. Serena hian Heather Watson chu third round-ah a lo hneh ve bawk a ni.
An unau hi vawi 26 an inhmachhawn na tur niin hengah hian a naupang zawk Serena ala chungnung zawka, vawi 14 chak tawhin Venus hi vawi 11 a chak tawh thung. An intawn hnuhnung ber chu kum 2009 Wimbledon final kha niin Serna a chak a ni.
Wimbledon-a sercice ná te
148mph - Taylor Dent: Vs Novak Djokovic, June 23 2010
147mph - Sam Groth: Vs Roger Federer, July 4 2015
146mph - Andy Roddick: Vs Sjeng Schalken, June 30 2004
145mph - Milos Raonic: Vs Tommy Haas, July 1 2015
144mph - Taylor Dent: Vs Lleyton Hewitt, June 28, 2001