Hun ṭha neih hman ṭangkai a ṭul - Giggs

Manchester United assistant manager Ryan Giggs chuan club rawltharte chu manager Louis van Gaal rilru hneh turin pre-season la thutak turin a fuih.

United-in season thar atana inpuahchahna atan Paris St-Germain, Barcelona, St Jose Earthquakes leh Club America te nen United States-ah friendly match an khel dawn. Dutch manager Van Gaal-a'n club tih ṭhin dan angin academy player-te senior team-a hman tlak turin chher a tum a, pre-season tour hman ṭangkai a tum niin tarlan a ni.

Kum 41-a upa Giggs chuan, "Player naupang zawkte hi khelh inbeisei miah loin tour-ah an kal ve a, amaherawhchu senior player inhliam avangin an khelh a ṭul thut ṭhin. Hei vang hian minute 10-15 te khelhna hun an nei a, an khelh ṭhat chuan match dangah an khel nawn leh ṭhin. Chuvangin pre-season tour hi a pawimawh takzet a, heta cheṭhate hi chuan inelna tak takah club tan khelhna hun ṭha an neih ṭhin," tiin a sawi.

Sir Alex Ferguson-a hnuaia seilian Giggs chuan sawi zelin, "Senior team tana khelh an duh chuan player naupangte hian an theihna neih angte an lanchhuah tir a ngai a, bul ṭan ṭhat chuan inrintawkna a awm. Hei vang hian player-te hian pre-season hi an lak thutak a ngai a ni," tiin pre-season match la thutak turin player-te a hrilh.

Media lam chuan United hian nipui transfer-ah pound maktaduai 150 bawr vel budget an nei niin an tarlang a, player langsar an lak luh chuan naupang zawk tan chuan khelh phak a harsa khawp ang. Chutihrualin Robin van Persie-a'n United a chhuahsan chuan rawlthar duhawm James Wilson te tan chuan season thara khelhna hmun tam zawk nei turin pre-season tour a pawimawh dawn a ni.