A vawi khat nan Bengaluru an tlawm

Bengaluru FC-in tun season Indian Super League-ah tlawm an nei ve ta a, Thawhṭanni zan khan ATK Mohun Bagan chuan Bangalore club hi 1-0 in an hneh. 

Australian striker David Williams chuan minute 33-naah he inkhela goal awmchhun hi a khung a, Melbourne City striker hlui tan tun season ISL-a a goal hmasa ber a ni. Zanin ISL inkhelah Mizo tamna Jamshedpur FC leh Mizo awm lohna FC Goa an inkhel dawn a, Jamshedpur-ah hian Laldinliana Renthlei, Ricky Lallawmawma, Isaac Vanmalsawma leh William Lalnunfela te chu player pawimawh an ni phak vek. Nizan khan Odisha leh NorthEast United an inkhel a, he thu buatsaih lai hian result kan hre hman lo. 

Indian Super League champion hian vaibelchhe riat an hlawh dawn a, pahnihnain vaibelchhe li an hlawh ang - semifinal-a chak lo team pahnihin vaibel-chhe 1.5 ve ve an dawng dawn thung. ISL-ah hian european league ang lo takin top four-ten semifinal an khel a, final hmangin champion tur zawn a ni ṭhin - league round-a point hmu sang ber chu League Winners Shield pek an ni a, AFC Champions League an khelh bakah nuai 50 pawisa fai an dawng bawk. 

League round-a point hmu sang berin Champions League an khelh avangin ISL champion-in AFC Cup playoff an khel thung a, I League champion-in AFC Cup chu group stage aṭangin an khel thung. 

Season liam ta I League champion Mohun Bagan chu ATK nen an inzawm tak avangin ATK Mohun Bagan hming chawiin AFC Cup an khel ang a, I League club-in tun season bikah Asian club inelna an hmachhawn dawn lo tihna a ni - ATK hi ISL champion an ni tho a, AFC Cup an khel thei tho tihna a ni - anni hmun ruak hi ISL league round-a pathumna Bengaluru FC-in an luah thung ang. 

I League-ah hian champion team-in vaibelchhe khat an dawng a, pahnihnain nuai 60 dawngin pathumnain nuai 40 an dawn thung. Indian top league-ah hian club-ten an duh zat zat sum player hlawhah an seng ngawt thei lo a, club tinin vaibelchhe 16.5 aia sang player hlawhah an sen a rem lo.