Eiruk thubuai vangin Dinamo Zagreb hotu pahnih man an ni

Tun hnaiah thamna sum leh eiruk thubuai vanga FIFA a mualpho mek laiin football-in chanchin duhawm lo a nei leh tawh a, Croatia rama an club lian ber pawl Dinamo Zagreb official pahnih chu chhiah awl ruk leh club sum hmang khaw loa puh an nih vangin man an ni.

Dinamo Zagreb hotu an man pahnihte hi club chairman Zdravko Mamic leh a unaupa club coach Zoran te an ni. Police te chuan an mi man pahnih hian club pawisa pound maktaduai 11.1 vel an tichingpen niin an sawi.

Kar hmasa Zirtawpni khan anti-corruption investigator-te chuan Mamic-a te unau bakah hian Croatian Football Federation-a an senior official pakhat leh tax inspector pakhatte chu he eiruk leh chhiah awlruk thubuaiah hian an inrawlh niin an sawi bawk.

Croatia leh German media-ten an report dan chuan heng eiruk thubuaia inhnamhnawiha puhte hian Dinamo Zagreb player an hralhna sum aṭangin pawisa an lo eiru ṭhin a ni.

Hetiang a nih lai hian Dinamo Zagreb chairman-te unau chuan an puhnaah hian an fihlim thu leh an fihlim ngei a ni tih tihchian an tum thu an sawi a, club thuchhuak chuan an chairman-te unau hi an puhna lakah hian an fihlim ngei an rin thu an sawi bawk.