2015 Copa America champion Chile
Chile-in an ramah a vawi khatna atan Copa America nomawi an chawi a, Inrinni zan final-ah Argentina chu penalty shootout hmangin an hneh.
Estadio Nacional, Santiago-ah hun pangngai leh extra time-ah goal a lut lo. Penalty shootout-ah Argentina tan substitute Gonzalo Higuain leh Ever Banega ten an hlah a, Chile 4-1 in an chak.
Arsenal forward Alexis Sanchez-a'n chakna goal a khung a, final-a vawi li chak lo tawh Chile-in kum 1916 a ṭan tawh Copa America-ah a vawi khatna atan an champion a. Argentina erawh 1993 Copa America hnuah South America ramte inelnaah hian an la champion leh lo.
Final chu
Chile-in an ramah champion an tumruh a, stadium-ah mipui an khat vek a, entu mipui ṭhenkhat chuan inkhel en manah $25,000 (Rs1585436) an seng hial. Jorge Sampaoli enkawl Chile hian bul an ṭan ṭha a, hla tak aṭanga Eduardo Vargas ball pet leh Arturo Vidal volley te chu a goal teuh nghal hle.
Argetina captain Lionel Messi freekick pet chu hnai tak aṭangin Sergio Aguero-a'n goal zawnah tauh mah se keeper Claudio Bravo-a'n mak takin a dang hman.
Darkar chanve a ral chauh tihin Argentina winger Angel di Maria chu inhliam vangin Ezequiel Lavezzi-a'n a rawn thlak a, Manchester United winger hian inhliam vangin 2014 World Cup final-a khel thei tawh lo bawk.
Argentina tan Lavezzi tan chance ṭha a hlah a, Chile tan Sanchez-a'n hun ṭha a bawhpelh bawk. Minute 90 chhunga chance ṭha ber erawh hun tawp hma hret a, Higuain a hlah a ni. Messi ṭha taka a lakluh hnuah Lavezzi a pe a, PSG midfielder pass ṭha tak chu Napoli striker hian goal ruakah a khung thei lo. Extra time-ah goal chance a awm a, goal erawh a lut lo thung.
Messi a ṭawl
Lionel Messi chiahin Argentina tan penalty a khung a, a ṭhianten an khungve loh avangin ram tan nomawi a la chawi lo. Barcelona tana nomawi ṭhahnem tak chawi tawh Messi thiam zia sawi nawn a ngai tawh lo a, amaherawhchu player ṭha tamna Argentina a champion pui theih loh avangin a famkim bik lo.
Argentina chak loh chhanah Barcelona-a hlawhchham Tata Martino an dem rawn a, Martino hian final-ah Sergio Aguero thlak turin Carlos Tevez aiin Higuain a ring zawk. Higuain hi chance ṭha hlahtu leh penalty pet over luahtu a ni.
Eng nge an sawi?
Chile midfielder Arturo Vidal chuan, "Duhthusam a takin a thleng. Chile mipui lawmna siam turin field chhungah kan theihna zawng zawng kan hmang a ni. World Cup kan hmachhawn leh turah theihtawp kan chhuah dawn a, tuna player-te hian hlawhtlinna chan hi kan phu a ni," tiin sawi.
Argentina midfielder Ezequiel Lavezzi chuan, "Engtik hunah emaw ni chuan Leo (Messi) hian Argentina hi a la champion pui ang. Kan tawrhna belchhahtu chu tun hi kan hunah kan ngai a, mahse kan champion si lo," tiin Messi a chhan.
Javier Mascherano - Barcelona midfielder hian 2014 FIFA World Cup final-a Germany an hneh loh ṭumin a khel a, Copa America-ah ṭum thum pahnihna a ni tawh bawk.
Mascherano chuan, "Tuna ka hun tawn hi ka sawifiah thiam lo. Argentina hi kan vanduai reng bik loh ka beisei. Copa America final vawi thum ka khel tawh a, kan chak lo vek. Final-a kan chak loh reng chhan hi ka hrethiam thei lo a ni. Chutihrualin World Cup final ang thoin kan fan-te'n theihtawp chhuaha min ṭawiawm avangin ka lawm a, an hlimna kan pe thei lo erawh pawi ka ti hle," tiin final-a chak loh hreawm a tih thu a sawi.
Chile coach Jorge Sampaoli chuan, "Alexis-a penalty khan lawmna namen lo min pe a ni. Tun inelna chhung zawng khan ka team-te kha team dang aia an chhiatna ka hmu lo. Chile tan a vawi khatna atan Copa America-ah kan champion a, tun hi Chile history-a player ṭhat ber ṭumah a ngaih theihin ka hria," tiin a sawi.
Chile Champion Kalkawng
Groupstage
2-0 Ecuador
Scorer : Vidal 67'; Vargas 84'(P).
3-3 Mexico
Scorer : Vidal 22', 55'(P); Vargas 42'.
5-0 Boliva
Scorer : Aranguiz 3', 66'; Sanchez 37'; Mendel 79'; Raldes 86'(OG).
Quarterfinal
1-0 Uruguay
Scorer : Isla 81'.
Semifinal
2-1 Peru
Scorer : Vargas 42', 64'.
Final
0-0 Argentina
Penalty Shootout-ah Chile 4-1 in an chak.
PENALTY SHOOTOUT
CHILE Score PARAGUAY
Fernández (G) 1 - 1 (G) Messi
Vidal (G) 2 - 1 (X) Higuaín
Aránguiz (G) 3 - 1 (X) Banega
Alexis (G) 4 - 1 -