Nadal hnehtu tla ve nghal

Beisei loh tak maiin kar hmasa Ningani khan Wimbledeon second round-ah Dustin Brown chuan Rafael Nadal a hneh a, beiseina sang tak nen Inrinni zan khan third round kelh leh mah se Viktor Troicki hneh loin last 16 a inhlangkai zo ta lo.

Court three-a inkhelah World ranking-a 102-na Brown hian Serbian seeded 22-na Viktor Troicki chu 6-4, 7-6, 4-6, 6-3 in a hneh lo a ni. A vawi khat nan Troicki hian Grand Slam quarterfinal lut turin Vasek Pospisil a hneh leh phawt a ngai ang.

Second round-a mi­pui barakhaihtu kum 30-a upa Brown chuan, "Kan duh leh beisei angin thil hi a kal vek thei ṭhin lo. Nadal ka hneh avang khan ka ṭha ta hluai tihna a ni chuang lo a, infiamnaah chuan vanneih leh vanduai ni a awm ve ṭhin. Troicki khan a khelh ṭhat avangin round sang zawk luh kha a phu a ni," tiin a sawi.