Hmeichhe champion lai a tla

Wimbledon champion lai Petra Kvitova chu Inrinni zan khan Jelena Jankovic hneh loin third round aṭangin a tla.

Seeded 28-na Jankovic hian 3-6, 7-5, 6-4 in world number 2 Kvitova hi a hneh. Set khatna hloh nghal mah se a beih hram hram na rah sengin set hnuhnung pahnih a la thei a ni. Jankovic hian last 16-ah kum 2012 finalist Agnieszka Radwanska a hmachhawn leh ang.

Vawi hnih champion tawh Kvitova hian a match hmasa pa­hnihah hnehna chang turin minute 93 chiah a hmang a, a match thum­naah pawh hian set khatna chu minute 35 chung leka a lak leh nghal avangin chak tur rin a ni leh hman. Amaherawhchu ni dang angin thil a kaltluang tawh lo thung.

Kum 25-a upa Kvitova hi kum 2009 hnu lamah khawvela Grand Slam ngaihhlut ber Wimbledon-ah hian last 16 ala thleng ziah. Kumin hi third round paltlang loa a tlak vawi khatna a ni nghe nghe.

Kum 30-a upa Jankovic chuan, "Ka lawm, ka lawm takzet tih bak chu sawi mai tur pawh ka hre lo. Chak tura mipui rin zawk ni lo mah ila keimah ka inrintawk vangin hnehna ka chang a ni," a ti.

Wimbledon vawi hnih cham­­­pion tawh Kvitova chuan, "Wimbledon-a ka thil tawn tawhah chuan ala hrehawm ber hial ang. Mihring ve tho ka nih avangin chak lo thei ka ni tih chu hriatsa vek a ni a, mahse hetiang em ema hmaa chak loh hi chu hriatthiam har ka ti," tiin a chak lo chu a ngaithiam lo hle.