Krismas laia hmahruaitu a chiang dawn

Zanin hian kumin chhunga Serie A match hnuhnung ber khelh a ni dawn a, krismas laia hmahruaitu tur a chiang nghal bawk ang. A chunga bera awm AC Milan leh Inter Milan te chu chungnung zawk nih inchuha inel lai an ni.

Milan hian dar 1:15-ah team ṭha Lazio an mikhual dawn, an inkhelhna tur hi San Siro a nih avangin Stefano Pioli naute hi chak tura rinkai an ni. Inter-in zan dar 11:00-ah Hellas Verona an hmachhawn hmasa thung ang.

Nizan khan champion lai Juventus chuan kumina an match hnuhnung ber atan Fiorentina an hmachhawn a, result kan hre hman lo. Serie A hian thlasik chawlh an nei zui dawn, nakkum January 3 zanah inelna an chhunzawm leh dawn.

Season hmasa tawp lamah AC Milan-in harh tharna an chang a, tun thlengin an la chhawm nung. Season kal laia hneh loh nei loa kaltluang thei an nih avangin hmahruaitu ni chunga kum tawp khar pawh an phu.

Pioli enkawl team hian an match hnuhnung berah Sassuolo 2-1 in an hneh, zanina an khingpui tur Lazio pawhin Napoli 2-0 a an hneh theih avangin Milan tan hmachhawn hautak an ni dawn.

Milan thiampuipa leh top scorer ni bawk Zlatan Ibrahimovic chu coronavirus lakah a fihlim tawh a, mahse training-na hmunah a tihrawl a hliam leh avangin Lazio a hmachhawn theih a rinawm loh, a tan kum a tawp tawha ngaih a ni.

Mualpho takin Champions League aṭangin Inter Milan pet chhuah an ni. Antonio Conte naute tan zah vanga indawm kun a ngai, mahse league lamah erawh tun hnaiah result an nei ṭha hle - a zawnin Serie A match rukah hnehna an chang ta.

Italian manager Conte chuan, "Ngelnghet taka khelh theih hun hi ka nghakhlel ṭhin, tunah chuan a lo thleng dawn ta niin ka hria," tiin Spezia an hneh hnuah a sawi. Verona mualah chak beisei chungin an lenglut ang.

Inter tan hian Romelu Lukaku chu innghahna a ni leh dawn. Belgium international striker hian tun season inelna hrang hrangah goal 15 a khung tawh, league bikah match 12 aṭanga goal 11 a khung theih avangin thlamuanpui tham a tling.