Silly Point : I Champions Trophy ila

ICC Mini World Cup an tih mai ṭhin, Test khel phak ram chauhte kum hnih dana an inkhawmpuia ICC Knock Out an tih tun hnu a, Champions Trophy hming lo pu ta chu kum riat zet a hmel kan hmuh tawh lo hnuah kan han thlir ho leh thei dawn. Lunghlui te pawh a leng rum rum mai dawn alawm.

Mi ngei India

Thlengtu Pakistan an ni a, ram buai fo ṭhin leh ngelnghet lo a ni tih chu khawvel hriat a ni. Kum 29 hnua Pakistan-in khawvel huap cricket tournament a thleng leh tur leh kum 2009-a Sri Lanka team te hel hoin an tihbuai hnua mumal taka International Cricket Khawmpui thleng leh tur Pakistan Cricket Board lam leh Pakistani mipuite an phur em em a ni.

Ram dang zawng zawng pawh hlauhthawnna la nei ṭun mah se, remna palai leh a chhe lai simṭhatu nih tumin Pakistan ram hi an pan a ni. BCCI erawh BJP hruaitu lawk ho kaihruai tih takah, Pakistan a Hamara Desh khela te tirh hi a tum lo bur thung.

ICC hi BCCI ta em ni?

ICC chairman nilai chu Jay Shah a ni a, khawvel cricket sum hnar leh hnuk chu BCCI a ni. BCCI khawih che zo leh hnial ngam tumah awm hek lo le, saipui kalin a kal ngaih ngaih mai si a, India inkhelh tur ho reng reng chu UAE a schedule sak an ngai ta.

Tu nge hnial zo anga? Tu nge dal ngam ang? India hi semifinal leh final a lo lut a nih chuan, a thlengtu Pakistan-a stadium leh khua an lo duan lawk tawh te pawh her danglam vekin, Dubai lama insawn thlengin a ngaih phah dawn ta cheu.

Hamara Desh

Ṭhangkhat lian dawn ICC Tournament champion hlei thei loa an awm hnuah, kumhlui lam khan India chuan T20 WC nomawi an hawn ve ta hlauh a nih kha maw! Amaherawhchu, World Cup pangngai leh Test Championship lama kan zuzina ṭhinlaina erawh a tidam kim thei lo a ni.

He ICC Champions Trophy hi Rohit Sharma leh a hoten an hawn thei nghat a nih chuan, hliam tidamtu balm ṭha tak erawh a ni dawn. Chu mai a ni lo, an hun hnuhnung hmang ve tawh, pensioner ni ve tawh mai tur Rohit Sharma leh Virat Kohli tan an hun tawp lam kharna ṭha ber a ni ngei anga, dinhmun derthawng a awm coach Gautam Gambhir a tan drip ṭha chi a ni dawn tih chu tlang hriat a ni.

Dubai lamah hian mahni khelmual India ram ang nena inang tak Pitch an hmachhawn dawn a. Jaspriit Bumrah leh Md Siraj a tellohna leh inhliam damkawr Md Shami kova India bowling dept mawhphurna awm tur hi an panna lai ni tura rin a ni a. Chuti mek lai chuan tun hnaia tluklehdingawn ni awm taka khawsak ching, tunhma zawnga kan lo uanpui India batting line up hi, tunhnaiah an khawsak fo ang lo deuh a, inkhel tin deuh thawa rintlak taka an awm a ngai ngei ang.

Champions Trophy chibai vek ule