Messi-a'n a talbuai thu a pha lo

Barcelona thiampuipa Lionel Messi chuan nipui lai khan hun duhawm lo tak a tawn thu a pha lo a, "Season ṭantir khan nipui laia ka hun tawn khan min tibuai a ni," tiin a sawi. 

Messi hian Barcelona thuneitute nen an inhmuh-thiam loh avangin Catalan club hi nipui lai khan chhuahsan a tum a, a contract-a inziak anga free transfer-a chhuah theihna dan a neiah a inngai. Mahse, Barca hian Messi chhuak tur chuan a contract-a inziak anga euro maktaduai 700-a a chhuah a ngaih thu an sawi a, Messi hian court-a kal a duh loh avang chauhin a cham. 

Kum 33 mi Messi chuan, "Tunah erawh ngai ka awh leh tawh a, nipui lai erawh kha chuan hun duhawm lo tak ka tawng a ni," a ti. Argentine forward hian tun season inelna hrang hrangah match 17 khelin goal kua a khung tawh a, assist vawi li a nei bawk - striker tam tak tana chhuanpui tham statistics hi Messi tan erawh a ṭha tawk lo. 

Barca president lailawk Carlos Tusquets chuan sum inrenchemna ang zawnga ṭawng chuan nipui khan Messi kha lo hralh zawk se an tihfuh tur thu a sawi a, mahse, Catalan club hian January-ah President thar an thlang dawn.

Messi chuan, "Tunah erawh nuam ti takin ka awm leh tawh a, inelna kan hmachhawn zawng zawngah nomawi chawi vek ka duh a ni. Kil hrang hrang thlirin Barca hian hun harsa tak kan tawng mek tih ka hria a, mahse, ka phur em em a ni," tiin a sawi.