Goal sur tirtu Paris Saint Germain

Paris Saint-Germain chuan an mikhual Brest lakah zahngaihna an lantir lo - Luis Enrique enkawl Paris club hian 7-0 tehmeuhin an mikhual an sawp a, nuamsa takin Champions League last 16 an lut.

Ligue 1 champion hian last 16-ah chuan Liverpool emaw Barcelona emaw an hmachhawn thei dawn a, a tu zawk zawk pawh hi pawt fuh ni se la khingpui awlsam tak an ni thei dawn lo.

PSG hian an intawn hmasakah Brest hi 3-0 in an hneh tawh a, an dinhmun a ṭha sa. Nilaini zan Parc des Princes-a inkhelah a khat mawi tawkin goal an khung reng a, inkhel pahnih belhkhawmah 10-0 tehmeuhin hnehna an chang.

Ligue 1 tana lawmawm lai chu goal khung thei player an ngah - Brest lakah hian player hrang pasarih - Bradley Barcola, Khvicha Kvaratskhelia, Vitinha, Desire Doue, Nuno Mendes, Goncalo Ramos leh Senny Mayulu ten goal khat ṭheuh an khung a ni.

Paris Saint-Germain hian league round an khelh ṭhat tawk loh avangin last 16 an lut tlang nghal mai lo a, playoff an khelh a ngaih phah. A thiam zual 16 zinga tel tur erawhin an ṭha tawk tih chiang takin an pholang thung.

Paris St Germain coach Luis Enrique chuan, "Goal sarih kan khung a, kan goal zawng zawng khan mi hran khung vek a ni. A nihna takah chuan khelmual chhunga lut player zawng zawng khan goal an khung vek ṭep a ni.

"Goal khung turin hun ṭha kan insiam hnem em em a, kan khingpui goal bulah player tin khan remchang an hmu vek ni berin ka hria, a lawmawm lai chu goal khung thei player kan ngah kha a ni.

"Ka naute kha an induhsak tawn em em vek a, mahni hmasial tak ni hlawm se la chuan tun ai khan goal kan khung tlem zawkin ka ring, thawhhona ṭha zar kan zo bawk a ni," tiin a sawi.

Paris club hian Champions League hmain Ligue 1 an khelh leh hmasak phawt a ngai dawn - Pathianni zanlaiah Lyon an lenchilh dawn a, league nomawi chu harsa lutuk loin an chawi leh theih mai chu a rinawm ta hle.

Mahse, Ligue 1 nomawi hi club thuenitu lamin an duh ber chu a ni lo. Arab sum hmanga siam len an nih hnuah PSG hian UCL nomawi chawi tumin an bei ṭhin a, mahse tun thlengin an la hlawhtling lo, kuminah pawh Barcelona leh Liverpool chu an hmaa awm thei an nih avangin an kawng a harsa dawn a ni.