Harsa takin Alcaraz a chak

Carlos Alcaraz chuan Qatar Open khelh laiah quarterfinal a lut - Spanish star hian Nilaini zan khan a khingpui Luca Nardi chu harsa angreng taka hnehin a thiam zual pariat zingah a inhlangkai a ni.

Centre Court-a inkhelah Alcaraz hi rinkai zawk a ni a, set khatna a lak bakah set hnihnaah pawh 4-1 in hma a hruai thei. Mahse, Nardi-a'n a zawna game nga lain set thumna an khelh phah hial, a tawpah 6-1, 4-6, 6-3 in Alcaraz a chak hram.

Grand Slam vawi li champion tawh Alcaraz chuan, "Nardi kha a chi ai duh miah lo a, a nihna takah chuan set hnihna kan khelh lai phei kha chuan world number 1 ang maiin a hlauhawm hial.

"Engtin nge set thumna ka khelh ang tih ka ngaihtuah buai nasa hman hle, mahse vanneih thlak takin a service chhuhsak theihna remchang ka hmu hlauh a, a tawpah ka vannei zui ta a ni," tiin a sawi.

Semifinal lut tur chuan Alcaraz hian Jiri Lehecka a hneh leh a ngai dawn - inkhel dangah Czech Republic tlangval hian Fabian Marozsan chu 6-4, 6-2 in a lo hneh ve thung.

Inkhel dangah seeded pahnihna Alex de Minaur pawh a chak - De Minaur hian quarterfinal lut turin Botic van de Zandschulp chu 6-4, 6-4 in a hneh a, Australian tlangval hian hard court bikah match 200 hnehna a chang tling ta chiah a ni.

Daniil Medvedev pawh a la chak - Russian tlangval hian Zizou Bergs chu 6-2, 6-1 in a hneh a, kum 2023 Qatar Open champion hian kuminah nomawi chawi leh ngei tumin kawng dik a zawh chho mek a ni.

Britain tlangval Jack Draper chuan straight set hmangin Christopher O’Connell a hneh a, Felix Auger-Aliassime erawh a khingpui Hamad Medjedovic a inhliam avangin inkhelh hah ngai loin a tlang thung.