Hornets lakah Lakers chak lo

Nimin zing NBA inkhelah Charlotte Hornets chuan player ṭha bik pahnih - LeBron James leh Luka Doncic te awmna Los Angeles Lakers chu 100-97 in an hneh.

Team pahnihte inkhelh hun hi Los Angeles ram kang avang khan a hun sawn a ni a, All-Star break an neih hnuah match an khelh lehna hmasa a ni. Lakers tan hian James leh Doncic te meuh awm mah se an team an chakpui zo lo.

Hornets tan hian Miles Bridges a langsar ber, ani hian point 29 a nei. A point neih zingah hian hun tawp dawna lay-up a neih mawi tak leh free throw a vawm luh te a tel a, tun hnaia team che ṭha lo tak hi a chakpui a ni.

Lakers thiampuipa James-a'n point 26 a nei a, a point neih zinga 16 zet chu quarter hnuhnung berah a ni. Cheṭhain a tawp lamah Lakers chakpui teuh hle mah se, three-point neih tuma a shot vawi hnih a hlah a, hun pawimawh laia chet fuh kim loh a pawi.

NBA Western Confe-rence table-ah Lakers hi pangana an ni chhunzawm, vawi 32 chak tawhin ṭum 21 zet an tlawm tawh a ni. Hornets hi vawi 14 an chakna chauh a ni a, Eastern Conference table-ah a hniam ber dawt (14) an ni thung.