Messi hoin Inter Miami an chak

Khaw vawt tak hnuaia inkhelah Lionel Messi chuan goal awmchhun a khung a, an team Inter Miami chu Sporting Kansas City lakah 1-0 in hnehna a chanpui.

Nimin zing khan Children's Mercy Park-ah CONCACAF Champions Cup first-leg khelh niin, minute 56-naah Messi hian goal awmchhun a khung a, second leg chu Inter Miami khelmualah an khelh dawn avangin tlang turin an dinhmun a ṭha.

Argentina captain hian goal hma a hlauhawm laiah ball kang chu a awmin a la thla a, goal khung turin a insiamrem zui, ball per hi amah vengtu midfielder Erik Thommy bum nana hmang zuiin Sporting goalkeeper John Pulskamp ban phak loh lam goal kilah a khung.

Messi bakah hian Barcelona tana a khelhpui ṭhin Luis Suarez chuan a khung teuh hle a, mahse Uryguyan striker pet hi goal ban hrulah a kal liam a, goal dang an khung belh thei ta bik lo.

Nimin zinga an inkhelhna hmun vawh lam hi -28C a ni hial a, football a khelh ve tawh chinah Messi chuan match a khelhna vawt ber a nih thu a sawi hial a, amah leh a ṭhiante tan inkhel awlsam a ni lo ang tih a chiang.

Inter Miami manager Javier Mascherano chuan, "Khaw vawt hi chu kan tuar fo a, mahni in lum aṭanga tawrh leh khelmuala khaw vawt hmachhawn hi chu a inang lo thei hle, a nihna takah chuan inkhelh kha a awlsam lo takzet.

"Inter Miami kan vanneihna chu Messi kan nei kha a ni, ani kha chuan hun harsa leh khirhkhan laiah pawh danglamna a siam thei mai ṭhin," tiin a captain Lionel Messi a dahsang hle a, season ṭha tak hman chhunzawm an beisei ngei ang.