Krismas vuakvektah Premier League inkhel hmuhnawm

Covid-19 vangin Premier League-ah inkhel entu awm mumal thei lo mah se inkhel hmuhnawmna a nep chuang lo a, ṭum dang ai mahin a hmuhnawm zawk emaw tih tur a ni. 

Kumin Krismasah champion lai Liverpool-in pakhatna dinhmun an hauh a, season liam ta pawh khan tun ang hunah hian pakhatna dinhmun hauhin season tawp thlengin a chung berah an awm.

Liverpool hian kum 2019 Krismasah pakhatna dinhmun luahin champion zui mah se hemi hmaa an record thlir chuan December 25-a hmahruaitu nih hi mangchhiaah a ngaih theih.

Kum 1996, 2008, 2013 leh 2018 khan Reds hi Krismas niah hmahruaitu an ni a, an champion zui lo vek. Tun ṭumah erawh player pawimawh Virgil van Dijk inhliam mah se champion lai an ni a, nomawi humhim turin Jurgen Klopp-a hote hi rinkai an ni ang.

Premier League season 28 khelh tawhah Krismas laia hmahruaitu vawi 15 an champion a, ṭum 13 dangah an champion zui lo. Statistics aṭanga thlir chuan Krismas laia hma hruai ngaih ṭhatna tur a la ni pha lo ang.

Liverpool-in League Cup fourth round-ah Arsenal an hneh lo a, amaherawhchu Premier League aṭanga teh chuan result ṭha a ni ta zawk. Reds hian hnehna chu chang se Man City nen an inhmachhawn dawn a, player inhliam an tam avangin match khelh tlem hi a thlanawm zawk.

Jurgen Klopp-a hoten kuminah West Brom (Dec 27) leh Newcastle United (Dec 30) te an hmachhawn dawn a, nakkum January 4 zanah Southampton nen an inkhel ang. An elpuite fixture nena khaikhin chuan an hmabak a awlsam a, hahdamna hun an nei ṭha zawk. League hmahruaitu nichungin kum thar an chuankai a rinawm.

Manchester khaw club pahnihin League Cup vangin Reds aiin match an ngah a, an khingpui tur pawh a harsa zawk hret niin a lang. Champion rinkai zinga mi Pep Guardiola hote hian nizana Arsenal an hmachhawn zawh hian Newcastle United (Dec 26), Everton (Dec 28) leh Chelsea (Jan 3) te an hmachhawn dawn. 

Ole Gunnar Solskjaer-a hote pawhin zanina Everton nen League Cup an khelh zawhah Leicester City (Dec 26), Wolves (Dec 29) leh Aston Villa (Jan 1) te nen an inkhel zui dawn. Squad chhah a pawimawh dawn a, Solskjaer-a'n Leeds United an hneh ṭuma Paul Pogba an chhawr lote leh hma taka Bruno Fernandes a la chhuakte kha an fixture thlir hian a hriatthiam awm hle.

Match hnih hnih an chak loh zawn hnuah Chelsea an insiamṭha a, West Ham an hneh. Amaherawhchu Frank Lampard-a hote hian Arsenal (Dec 26), Aston Villa (Dec 28) leh Man City (Jan 3) te an hmachhawn dawn a, point kua hmuh a harsa dawn.

Arsenal-in Premier League-ah result ṭha an nei lo a, Europe lam an thlir thei lo, relegate loh dan an zawn phawt a ṭul dawn. Gunners hi League Cup-a an la dam avangin khelh tur an ngah a, Boxing Day-a Chelsea laka point an hmuh theih chuan inrintawkna nen Brighton (Dec 29) leh West Brom (Jan 2) an hmachhawn thei ang.

Tottenham erawhin fixture hautak zet an hmanga zo a, match hnuhnung pahniha Liverpool leh Leicester City an hneh loh avangin a sang pali an chhuahsan. Jose Mourinho hote hian Wolves (Dec 27), Fulham (Dec 30) leh Leeds United (Jan 2) lakah result ṭha an beisei ang.

Krismas vuakvetah fixture a hautak dawn a, club lian hoin substitution panga hman ve an duh. Season ṭantirh khan vote ṭum hnih an la tawh a, substitution pathum duh an tam zawk.

December thla tir khan vote an la ṭha leh a, substition panga duh club chu 10-ah pung chho mah se dan thlak tur chuan club 14-in an remtih a ngaih avangin thlak a ni ta lo. Substitution pathum duh club te hi Aston Villa, Burnley, Crystal Palace, Fulham, Leicester City, Leeds United, Newcastle United, Sheffield United, West Ham United leh Wolverhampton Wanderers te an ni a. Dan an thlak tak loh avangin manager-ten awmze neia player an chawlhtir thiam a ṭul dawn a ni.